Yetişmiş narlar daha şirin olur və tərkibində daha çox faydalı qida maddələri saxlayır.
Bizim.Media xarici mediaya istinadən xəbər verir ki, şirin, yetişmiş və şirəli narı seçmək üçün bir neçə sadə əlamətə diqqət yetirmək kifayətdir. Mütəxəssislər meyvənin formasına, çəkisinə və qabığının vəziyyətinə xüsusi diqqət yetirməyi tövsiyə edirlər.
Dietoloq Steysi Vudsonun sözlərinə görə, ən yetişmiş və dadlı nar heç də həmişə xarici görünüşcə ideal olmur.
O, tam dairəvi meyvə əvəzinə bir qədər kvadratvari və ya qeyri-bərabər formalı nar seçməyi məsləhət görür. Mütəxəssis bildirir ki, narın bəzi tərəflərinin yastı və ya qeyri-adi formada olması onun daxilindəki dənələrin şirə ilə dolduğunu və meyvənin formasını dəyişdirdiyini göstərə bilər.
Narın çəkisi nəyi göstərir?
Nar alarkən bir neçə meyvəni əlinizə götürərək çəkilərini müqayisə etmək və ya mağazadakı tərəzidən istifadə etmək tövsiyə olunur.
Steysi Vudsonun sözlərinə görə, eyni ölçüdə olan narlar arasında daha ağır olanı seçmək daha məqsədəuyğundur.
“Əlavə çəki dənələrin şirə ilə dolduğunu, daha sulu, şirin və qida maddələri ilə zəngin olduğunu göstərir”, - dietoloq bildirib.
Narın keyfiyyətini yoxlamaq üçün onu əlinizdə yüngülcə sıxmaq və ya çəkisini hiss etmək məqsədilə bir qədər hərəkət etdirmək olar. Meyvə bərk və dolğun olmalıdır. Həddindən artıq yüngül və içiboş təsiri bağışlayan narlardan uzaq durmaq məsləhətdir.
Narın qabığı necə olmalıdır?
Narın qabığının quruluşu da onun keyfiyyəti haqqında mühüm məlumat verir. Dietoloq möhkəm, elastik və sıx qabıqlı meyvələrə üstünlük verməyi tövsiyə edir. Keyfiyyətli narın qabığında çatlar və əziklər olmamalıdır. Mütəxəssisin sözlərinə görə, qabıqdakı çatlar bəzən həddindən artıq suvarma nəticəsində yarana bilər. Lakin bu, göbələk infeksiyasının əlaməti də ola bilər. Qida təhlükəsizliyi baxımından çatlamış narları almamaq daha məqsədəuyğundur. Əziklər isə narın şirəliliyinə və qida dəyərinə təsir göstərə bilər.
2023-cü ildə aparılan araşdırmada 28 gün ərzində saxlanılan əzik və zədəsiz narlar müqayisə edilib. Nəticədə zədələnmiş meyvələrin daha az elastik, daha kiçik və daha yüngül olduğu müəyyənləşdirilib.
Hansı narları almaq olmaz?
Mütəxəssislər toxunduqda yumşaq olan və qabığı qırışmış narlardan uzaq durmağı məsləhət görürlər. Bu əlamətlər meyvənin həddindən artıq yetişdiyini və hətta daxilində qıcqırma prosesinin başladığını göstərə bilər. Narın üzərində kif varsa və ya ondan xoşagəlməz qoxu gəlirsə, belə meyvəni almaq olmaz.
Narın rəngi onun yetişdiyini göstərirmi?
Narın ən xarakterik xüsusiyyətlərindən biri yaqut-qırmızı rəngidir. Lakin mütəxəssisin sözlərinə görə, meyvənin rəngi onun yetişmə səviyyəsi haqqında düşünüldüyü qədər dəqiq məlumat vermir. Yetişmiş narın rəngi açıq çəhrayıdan tünd yaqut-qırmızıya qədər dəyişə bilər. Bu səbəbdən yalnız rəngə baxaraq onun nə qədər şirin və şirəli olduğunu müəyyənləşdirmək mümkün deyil. Steysi Vudson nar seçərkən ilk növbədə meyvənin çəkisinə, formasına və qabığının quruluşuna diqqət yetirməyi tövsiyə edir. Bununla belə, qabığın rənginin bərabər olması müsbət əlamət sayılır.
Qeyri-bərabər və ləkəli rənglənmə meyvənin müxtəlif hissələrinin eyni səviyyədə yetişmədiyini göstərə bilər. Bu isə narın daxilindəki dənələrin şirinliyində və qida maddələrinin paylanmasında fərqliliklərə səbəb ola bilər.
Narın sağlamlıq üçün hansı faydaları var?
Nar yalnız dadı ilə deyil, sağlamlıq üçün potensial faydaları ilə də seçilir. Mütəxəssislərin sözlərinə görə, narın tərkibindəki faydalı birləşmələr qaraciyərin sağlamlığını dəstəkləyə, iltihabi proseslərin azalmasına və hüceyrələrin zədələnmədən qorunmasına kömək edə bilər.
Bəzi araşdırmalar narın yüksək xolesterin və qan şəkəri səviyyəsi ilə əlaqəli metabolik proseslərə müsbət təsir göstərə biləcəyini də irəli sürür. Bununla belə, nar qaraciyər xəstəliklərinin müalicəsi üçün dərman hesab edilmir. O, yalnız balanslaşdırılmış qidalanmanın faydalı hissəsi ola bilər.
Narı tumları ilə birlikdə yemək olarmı?
Narın içərisində gündəlik danışıqda tum adlandırılan çoxsaylı toxumlar yerləşir. Əslində, hər bir nar dənəsi şirəli qırmızı örtükdən və onun daxilindəki toxumdan ibarətdir. Bu toxumlar sərt və ya yarımsərt ola bilər. Çinli alimlərin apardığı araşdırmalar göstərib ki, nar toxumları müxtəlif fitokimyəvi birləşmələrlə zəngindir. Bu səbəbdən narın toxumları da meyvənin faydalı hissəsi hesab olunur və çeynəməkdə çətinlik yaratmadığı halda yeyilə bilər. (Lent.az)
Bizim.Media
