Xətai rayonunda yaşıllıqların məhv edilməsi prosesi davam etdirilir.
Bu acınacaqlı hadisə ilə bağlı redaksiyamıza yeni faktlar daxil olub.
Təqdim edilən fotolardan aydın olur ki, ağaclar kütləvi və fərdi qaydada məhv edilir. Kütləvi məhv edilən ağaclar əvvəlcə hündür hasara alınır.
MÖVZU İLƏ BAĞLI:
Xətai rayonunda yaşıllıqlar belə məhv edilir – FOTOFAKT
Sonra bir gecənin içində ağaclar kəsilib, ərazidən daşınır. Fərdi qaydada isə ağaclar ya tikinti altına salınır, ya da ki, onların quruması üçün ağılagəlməz addımlar atılır. Məsələn, Əhmədli yaşayış massivində Məhəmməd Hadi küçəsi 103 ünvanda qocaman ağac bir gecənin içində kəsilib. Ağac qatilləri öz bəd əməllərindən sığortalanmaq üçün əraziyə fidanlar basdırıb.
Təqdim edilən başqa bir görüntü isə “Bakı” kinoteatrının yaxınlığında çəkilib. Deməli, burdakı Natariot kontorunun sahibi öz ofisini genişləndirmək üçün neçə illərin ağacını tikilinin içinə salıb.
Bura yaxın digər ərazidə isə ağaclar daş və dəmir çərçivəyə alınaraq aqrotexniki qulluqdan məhrum edilib.
Belə vəziyyətdə isə ağaclar qurumağa məhkum olur. Nəticədə bir müddət sonra quruyan ağacın kəsilməsi “zərurəti yaranır”. Beləcə, yaşıllıqlar işbazların fərdi maraqları və müvafiq qurumların laqeyidlikləri ucbatından yavaş-yavaş məhv edilir.
Bəs, belə qanunsuzluqlara nə zaman “dur” deyiləcək?
Surxay Atakişiyev, Bizim.Media
