Yazın gəlişi insanları təbiət qoynunda daha çox vaxt keçirməyə sövq edir. Amma bəzi insanlar yaz aylarında təbiət qoynunda olarkən müxtəlif allergik xəstəliklərə yoluxurlar. Bu xəstəliklər mövsümü xarakter daşısa da, insanların həyatını cəhənnəmə çevirə bilir.
Mövzu ilə bağlı Bizim.Media-ya danışan allerqoloq Aysel Mehdiyeva deyir ki, yaz allergiyasına qarşı ən effektiv tədbirlərdən biri səhər saatlarında (05:00–10:00) açıq havada az olmaqdır:
“Çünki bu saatlarda havada polen çox olur. Gün eynəyi və maska taxmaq allergiyadan qorunmağa kömək edir. Evə gələn kimi üzünüzü yuyun, mümkün olsa, duş alın. Çöldə geyindiyiniz paltarları evdə dəyişin. Evdə pəncərələri xüsusilə küləkli günlərdə bağlı saxlayın. Kondisioner varsa, filtrini tez-tez təmizləyin. Həftədə 2–3 dəfə evdə nəm təmizlik edin.
Toz yığan xalça və ağır pərdələri minimuma endirin, hava təmizləyicidən çox faydalanın. Duzlu su ilə burun yuma (aptekdə “sea water spray”) çox effektivdir. Allergiya damcıları (məsələn, antihistamin göz damcıları) lazım olduqda istifadə edilir”.
Qida faktoru
Allerqoloq hesab edir ki, bəzi qidalar allergiyanı artıra bilir:
“Əgər ağac tozuna allergiya varsa, o zaman alma, armud, fındıq qəbulu bəzən reaksiya verə bilər. Bununla belə antioksidantlarla zəngin qidalar - nar, sitrus meyvələri, yaşıl tərəvəzlər çox faydalıdır. Bununla paralel, allergiya güclüdürsə, həkim məsləhəti ilə antihistamin tabletlər, burun spreyləri (kortikosteroidlər) ən yaxşı vasitədir. Bu müalicəyə mövsüm başlamazdan 1–2 həftə əvvəl başlamaq daha yaxşı üsüldur”.
Surxay Atakişiyev, Bizim.Media
