İraqda 3800 illik körpü aşkar edildi

Arxeoloqlar İraqın cənubundakı Larsa şəhərində, Böyük Kanalın üzərində təxminən 3800 il əvvəl tikilmiş qədim körpünün qalıqlarını aşkar ediblər. 

Bizim.Media Rusiya mətbuatına istinadən xəbər verir ki, bu tikili Fransa və İraqın birgə ekspedisiyası zamanı üzə çıxarılıb. 

Ən əhəmiyyətli tapıntılar arasında, e.ə. 1849–1843-cü illərdə şəhəri idarə etmiş Kral Sin-İddinamın adının həkk olunduğu bir kərpic də var.

Qədim şəhərin şərq hissəsində yerləşən körpü, təxminən 22 metr enində olan kanalın üzərindən keçid rolunu oynayırdı. Onun dayaqları bişmiş kərpicdən tikilib.
 

Tədqiqatçılar müəyyən ediblər ki, tikili bir neçə mərhələdə inşa edilib və sonradan yenidən qurulub. Hökmdarın adının yazıldığı kərpic körpünün tikilmə tarixini və zaman keçdikcə ona edilən dəyişiklikləri aydınlaşdırmağa kömək edəcək.

E.ə. II minilliyin əvvəllərində Larsa Mesopotamiyada mühüm siyasi və iqtisadi mərkəz idi. Geniş kanal şəbəkəsi kənd təsərrüfatı torpaqlarının suvarılmasını təmin edir, həmçinin malların daşınması və insanların hərəkəti üçün bir yol rolunu oynayırdı.

Bu körpünün öyrənilməsi qədim şəhərlərin öz nəqliyyat infrastrukturunu necə təşkil etdikləri və su ehtiyatlarını necə idarə etdikləri barədə daha ətraflı məlumat verəcək.

Bizim.Media