Qazaxıstanda rüşvət qalmaqalları - Tokayev vaxt qoydu

Qazaxıstan hökuməti və nəzarətedici orqanları noyabrın 24-də Prezident Kasım-Jomart Tokayevə dövlət şirkətlərində korrupsiya risklərinin azaldılması ilə bağlı konkret təkliflər təqdim etməlidirlər.

Bizim.Media “Akorda” nəşrinə istinadən xəbər verir ki, dövlət başçısı bu barədə Təhlükəsizlik Şurasının müşavirəsində bildirib.

Tokayev qeyd edib ki, müxtəlif səviyyəli rəhbərlər tərəfindən törədilən korrupsiya hüquqpozmaları ilə bağlı bütün siqnallar Baş Prokurorluğun iştirakı ilə Milli Təhlükəsizlik Komitəsinin (MTK) Korrupsiyaya Qarşı Mübarizə Xidməti tərəfindən operativ və hərtərəfli yoxlanılacaq.
 

O, həmçinin vurğulayıb ki, "Samruk-Kazına" Milli Rifah Fondunun və dövlət şirkətlərinin, o cümlədən "Qazaxıstan Dəmir Yolları"nın ("Қазақстан темір жолы") aparatının işi dayandırılmayıb və ştat rejimində davam edir:

"Lakin bu səs-küylü hadisənin göstərdiyi kimi, korrupsiya riskləri dövlət şirkətlərində “Axilles dabanı” olaraq qalır", – deyə Tokayev vurğulayıb.

Bununla əlaqədar o, hökumətə və nəzarətedici orqanlara korrupsiya hüquqpozmalarının kəskin şəkildə azaldılması, eləcə də kvazidövlət sektoru şirkətlərinin və onların aparat əməkdaşlarının işinin keyfiyyətcə yaxşılaşdırılması üzrə təkliflər hazırlamağı tapşırıb.

Xatırladaq ki, noyabrın 11-də Qazaxıstan Milli Təhlükəsizlik Komitəsinin Korrupsiyaya Qarşı Mübarizə Xidmətinin əməkdaşları "Samruk-Kazına" fondunun İdarə Heyətinin sədri Nurlan Jakupovu və "Qazaxıstan Dəmir Yolları" milli dəmir yolu şirkətinin rəhbəri Eljas Otınşiyevi saxlayıblar.

MTK-nın məlumatına görə, onlar və digər saxlanılan şəxslər korrupsiyada şübhəli bilinirlər. Bununla belə, ehtimal olunan cinayətin konkret təfərrüatları, o cümlədən mümkün sxem və şübhəlilərin rolu rəsmi olaraq açıqlanmır.

Bizim.Media