Google-un həmtəsisçisi Sergey Brin Kaliforniyada varlı sakinlər üçün təklif olunan birdəfəlik 5 faizlik sərvət vergisinə qarşı çıxdığını bildirib.
Bizim.Media xəbər verir ki, bu barədə The New York Times məlumat yayıb.
Kaliforniyada yaşamış milyarder təşəbbüslə mübarizəyə artıq təxminən 57 milyon dollar xərclədiyini deyib. Brinin fikrincə, bu vergi ştatı onun ailəsinin vaxtilə tərk etdiyi keçmiş SSRİ-yə bənzər sosialist modelinə yaxınlaşdıra bilər.
“Mən ailəmlə birlikdə 1979-cu ildə sosializmdən qaçmışam və onun Sovet İttifaqında necə dağıdıcı və boğucu cəmiyyət yaratdığını bilirəm. Kaliforniyanın da eyni yola düşməsini istəmirəm”, - deyə Sergey Brin bildirib.
Təklif olunan vergi Kaliforniyada aktivləri 1,1 milyard dollardan çox olan sakinlərə şamil edilməlidir.
Təşəbbüsün tərəfdarları bildirirlər ki, bu addım səhiyyə sahəsində federal maliyyələşmənin azalmasını kompensasiya etmək üçün vacibdir. Planlaşdırılan vəsaitin təxminən 90 faizinin ictimai səhiyyə proqramlarına yönəldilməsi nəzərdə tutulur.
Əleyhdarlar isə hesab edirlər ki, belə vergi varlı vergi ödəyicilərinin ştatı kütləvi şəkildə tərk etməsinə səbəb ola bilər. Kaliforniya qubernatoru Gevin Nyusom da təşəbbüsə qarşı çıxanlar sırasındadır.
The New York Times yazır ki, bir sıra tanınmış milyarderlər artıq Kaliforniyanı tərk etməyə başlayıblar.
Google-un digər həmtəsisçisi Larri Peyc Kaliforniyada 45-dən çox şirkəti köçürüb və ya bağlayıb, həmçinin Mayamidə malikanə alıb.
Sergey Brin də 15 şirkəti bağlayıb və ya başqa ştatlara köçürüb. Onun Florida və Nevadada daşınmaz əmlak aldığı bildirilir.
Meta-nın rəhbəri Mark Zukerberqin də ştatı tərk etdiyi qeyd olunur. İnvestor Piter Til biznesini və yaşayış yerini Kaliforniyadan köçürən ilk böyük sahibkarlardan biri olub və daha sonra vergi təşəbbüsünə qarşı kampaniyaya 3 milyon dollar ianə verib.
Maqnat Don Henki bu vergini “absurd” adlandıraraq ştatdan gedib. Uber-in keçmiş rəhbəri Trevis Kalanik də köçdüyünü təsdiqləyib.
DoorDash-ın həmtəsisçisi Endi Fan isə Kaliforniyanı tərk etməyi planlaşdırdığını açıqlayıb və təşəbbüsü “axmaq” adlandırıb.
Oracle-un qurucusu Larri Ellison isə Pacific Heights rayonundakı malikanəsini 45 milyon dollara satıb. Bununla belə, həmin ev onun əsas yaşayış yeri olmayıb.
Bizim.Media
