İran qəzeti Xameneyinin səssizliyinə haqq qazandırmağa çalışır – VİDEO

Tehran Bələdiyyəsinin “Həmşəhri” qəzeti ölkənin ali rəhbəri Müctəba Xameneiyə aid səs yazılarının niyə yayımlanmadığı ilə bağlı təhlükəsizlik yönümlü izah təqdim edib.

Bizim.Media xəbər verir ki, qəzet materialında Müctəba Xameneyini “İnqilabın üçüncü lideri” kimi təqdim edərək bildirib ki, müasir səs analizi texnologiyaları bir audio fayldan çəkiliş yeri və vaxtı, istifadə olunan avadanlıq, eləcə də danışanın bəzi xüsusiyyətləri barədə məlumat əldə etməyə imkan verir.

Üç dəqiqəlik videoda iddia olunur ki, səs yazısının paylaşılması təhlükəsizlik riski yarada bilər.

Bildirilir ki, otaqdakı əks-səda qapalı məkanın ölçülərini, elektrik şəbəkəsinin tezliyindəki dəyişikliklər yazının qeydə alındığı vaxtı və şəbəkəni, kondisioner və havalandırma sisteminin səsləri isə coğrafi məkanı müəyyən etməyə kömək edə bilər.

Videoda qeyd olunur ki, istifadə olunan mikrofonun səsdə yaratdığı fərqli xüsusiyyətlər cihazın “barmaq izi” kimi çıxış edə bilər.


Bizim.Media