Moskvada ukraynalı sabiq məmurun avtomobili partladıldı – Video

Moskvanın Çertanovo rayonunda hərəkətdə olan avtomobilin partlaması nəticəsində 72 yaşlı jurnalist Sergey Zavorotnı ağır xəsarət alıb. 

Bizim.Media xəbər verir ki, hadisə bu gün paytaxtın cənubunda, Kirovoqradskaya küçəsində baş verib.

Şahidlərin sözlərinə görə, “Toyota” markalı avtomobil hərəkətdə olarkən güclü partlayış baş verib. Partlayış dalğası sürücü Zavorotnını avtomobildən kənara atıb.

Məlum olub ki, avtomobil Ukraynada dövlət vəzifələrində çalışmış jurnalist Sergey Zavorotnıya məxsusdur. Rusiya mətbuatının məlumatına görə, o, Ukraynanın keçmiş Baş naziri Nikolay Azarovun müşaviri vəzifəsində çalışıb.
 

Zavorotnı beyin əzilməsi, sol qolunun çiyin səviyyəsində travmatik amputasiyası, qabırğalarının sınığı və sağ baldır sümüyünün açıq sınığı diaqnozları ilə xəstəxanaya yerləşdirilib.

İlkin məlumatlara görə, avtomobilin sürücü tərəfdəki alt hissəsinə maqnit vasitəsilə bərkidilmiş, tərkibində 300 qram trotil olan partlayıcı qurğu yerləşdirilib.

Faktla bağlı Rusiya İstintaq Komitəsi tərəfindən cinayət işi açılıb.


Bizim.Media