Xaçmazın 18 300 nəfər əhalisi olan Xudat şəhərinin xəstəxanasının bağlanması, hazırda burada fəaliyyət göstərən Ailə-Sağlamlıq Mərkəzinin dar çərçivədə fəaliyyət göstərməsi ilə bağlı bir məlumat vermişik.
Bir neçə gündür ki, Xudat şəhər xəstəxanasının ərazisində söküntü işləri gedir. Söküntü işlərindən sonra Ailə-Sağlamlıq Mərkəzinin yenilənəcəyi barədə məlumatlar dolaşır.
MÖVZU İLƏ BAĞLI:
Bakıda tibb müəssisəsinin eyvanı QƏZALI VƏZİYYƏTDƏ – VİDEOREPORTAJ
Məsələ ilə bağlı TƏBİB-in mətbuat xidmətinin rəsmisi Zamirə Adilova ilə əlaqə saxladıq. TƏBİB rəsmisi Bizim.Media-nın şimal bürosuna açıqlamasında burada yeni şöbənin inşa ediləcəyini bildirib:
"Xudat şəhər Təcili Tibbi Yardım bölməsinin yerləşdiyi - 1958-ci ildə tikilən 2 mərtəbəli binada xidmətlərin genişləndirilməsi və digər kliniki müayinələrin müasir standartlara uyğun həyata keçirilməsi məqsədi ilə hazırda əsaslı təmir işləri həyata keçirilir. Təmir işlərinə bu il noyabr ayının 3-dən başlanılıb.
Həmin ərazidə bu günədək söküntü işləri həyata keçirilib və bu istiqamətdə işlər yekunlaşmaq üzrədir. İş qrafikinə əsasən əsaslı təmir işlərinin 6 ay ərzində başa çatdırılması nəzərdə tutulub."
TƏBİB-in mətbuat katibi Xudat Ailə-Sağlamlıq Mərkəzinin binasının təmirinin növbəti ildə həyata keçirilməsinin planlaşdırıldığını qeyd edib.
Aytəkin Alxaslı, Bizim.Media, Şimal bürosu
