Xəbər verildiyi kimi Nərimanov rayonu Koroğlu Rəhimov küçəsində inşa edilən yerüstü piyada keçidinin söküntüsünə başlanıb. Tikilinin bir hissəsi artıq dağıdılıb. Iddialara görə 3 mərtəbə hündürlüyündə olan keçiddən istifadə olunmadığı üçün aidiyyəti qurum tərəfindən sökülməsi qərarı verilib.
Sözügedən piyada keçidinin inşasını aparan və hazırda söküntüsünə başlayan Azərbaycan Avtomobil yolları Agentliyindən Bizim.Media-ya məsələyə aydınlıq gətirilib.
MÖVZU İLƏ BAĞLI:
Paytaxtda eybəcər MƏNZƏRƏ - Piyada keçidi niyə sökülür? - FOTO
Agentliyin mətbuat katibi Anar Nəcəflinin sözlərinə görə Koroğlu Rəhimov küçəsində işıqforla tənzimlənən piyada zolağı yaradıldığı üçün yerüstü piyada keçidinin inşası məqsədəuyğun hesab edilməyib:
“Sözügedən yerüstü piyada keçidi sökülərək zəruri olan başqa ərazidə quraşdırılacaq”, - deyə Anar Nəcəfli əlavə edib.
Qeyd edək ki, vaxtilə keçidin tikilməsi üçün Şəhərsalma və Arxitektura Komitəsindən icazə, həmçinin Bakı Nəqliyyat Agentliyindən razılıq verilməyib.
Alçina Amilqızı, Bizim.Media
