Ermənistan Rusiyadan Avrasiya İqtisadi Komissiyasına şikayət etdi

Ermənistanın iqtisadiyyat naziri Gevorq Papoyan Rusiyanın tətbiq etdiyi məhdudiyyətlər fonunda ölkənin istixana təsərrüfatı məhsullarının ixrac edildiyi yeni bazarların adlarını açıqlayıb.

Bizim.Media xəbər verir ki, "Sputnik Ermənistan"ın məlumatına görə, parlament komissiyalarının birgə iclasında büdcə müzakirələri zamanı nazir ölkəsinin alternativ addımlarını və Rusiya ilə yaranan ticarət problemini şərh edib.

G. Papoyan bildirib ki, hökumət rüsumların və nəqliyyat xərclərinin böyük bir hissəsini subsidiyalaşdırır, nəticədə Ermənistanın istixana məhsulları artıq Gürcüstan, Ukrayna, Yunanıstan, Qazaxıstan və digər ölkələrə ixrac olunmağa başlayıb.

Nazir vurğulayıb ki, bu proses davam edəcək və ixrac həcminin daha da artacağı gözlənilir:

"Burada heç bir məhdudiyyət yoxdur: nə qədər çox ixrac etsələr, biz də bir o qədər çox subsidiya verəcəyik".

Ermənistan rəhbərliyi malların Rusiyaya ixracı zamanı qarşılaşdıqları maneələrlə bağlı rəsmən Avrasiya İqtisadi Komissiyasına (AİK) müraciət edib.

Nazir qeyd edib:

"AİK-ə müraciət etmişik ki, Komissiya bizə qarşı tətbiq edilən maneə və məhdudiyyətlər məsələsinə baxsın. Orada müəyyən prosedurlar var və biz onlara uyğun hərəkət edirik".

Bizim.Media