Bu gün Vətən müharibəsinin başlamasından 6 il ötür.
Bizim.Media xəbər verir ki, səhər saatlarından başlayaraq Vətən müharibəsi şəhidlərini yad etmək üçün Hərbi Memorial Məzarlığı ziyarət edilir.
Anım Günü ilə əlaqədar Vətən uğrunda şəhid olanların yaxınları, rəsmi şəxslər, ictimaiyyət nümayəndələri, eləcə də vətəndaşlar şəhidlərimizin xatirəsinə ehtiram əlaməti olaraq xiyabanı ziyarət edir, məzarları önünə əklil və gül dəstələri qoyur.
Qeyd edək ki, Azərbaycan Prezidenti İlham Əliyevin 2020-ci il dekabrın 3-də imzaladığı Sərəncama əsasən, hər il sentyabrın 27-si Vətən müharibəsində qəhrəmancasına döyüşmüş, Azərbaycanın ərazi bütövlüyü uğrunda canlarından keçmiş şəhidlərin əziz xatirəsinin yad edilməsi məqsədilə Anım Günü kimi qeyd edilir.
2020-ci il sentyabrın 27-də başlayan və 44 gün davam edən Vətən müharibəsi Azərbaycanın müasir tarixində mühüm dönüş nöqtəsi olub. Müharibə Azərbaycanın ərazi bütövlüyünün və suverenliyinin bərpası ilə nəticələnib.
Vətən müharibəsində 2908 hərbi qulluqçu şəhid olub
Vətən müharibəsində Azərbaycan Silahlı Qüvvələrinin 2908 hərbi qulluqçusu şəhid olub, 6 nəfər isə itkin düşmüş hesab edilir.
Ermənistanın hərbi təcavüzü nəticəsində 12-si uşaq, 27-si qadın olmaqla 93 mülki şəxs həlak olub, 454 mülki vətəndaş yaralanıb.
Müharibə zamanı ümumilikdə 12 292 yaşayış və qeyri-yaşayış sahəsinə, 288 nəqliyyat vasitəsinə ziyan dəyib. Həmçinin 1018 fermer təsərrüfatı üzrə zərər faktı aşkar edilib.
Şəhidlərin xatirəsi ehtiramla yad edilir
Vətən müharibəsinin tarixi nəticəsinin əldə olunmasında Azərbaycan Ordusunun qəhrəmanlığı, hərbi qulluqçuların peşəkarlığı, xalqın həmrəyliyi və dövlət rəhbərliyinin həyata keçirdiyi siyasət mühüm rol oynayıb.
27 Sentyabr – Anım Günü Vətən uğrunda həyatını qurban verən şəhidlərin əziz xatirəsinə dövlət və xalq səviyyəsində göstərilən ehtiramın ifadəsidir. Bu gün şəhidlərin fədakarlığı ilə yanaşı, müharibə iştirakçılarının və qazilərin göstərdiyi şücaət də ehtiramla yad edilir.
Fəridə, Bizim.Media
