Yararsız vəziyyətdə olan təcili yardım avtomobili ilə bağlı AÇIQLAMA - VİDEO

Sosial şəbəkələrdə yarasız vəziyyətədə çağırışlara gedən təcili tibbi yardım maşınının görüntüləri  yayılıb.

Bizim.Media-nın cənub bürosu xəbər verir ki, 44-AC-447 dövlət nömrə nişanlı təcili yardım avtomobilinin bu vəziyyətdə istifadə olunması vətəndaşlar arasında narazılığa səbəb olub. 

Onlar iddia edirlər ki, avtomobilin nə işıqları yanır, nə də  qapıları bağlanmır. Təcili  yardım avtomobilinin Masallı  rayonuna aid olduğu iddia olunur.

Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) bildirilib ki, yayılan videogörüntülər araşdırılıb:

“Sözügedən nəqliyyat vasitəsinin istismar müddəti bitdiyinə görə, uzun müddətdir ki, xidmətdən kənarlaşdırılıb. Çəkiliş aparılmış nəqliyyat vasitəsi artıq xidməti avtomobil deyil”.

Masallı Rayon Mərkəzi xəstəxanasının ictimaiyyətlə əlaqələr şöbəsindən isə bildirildi ki, sözü gedən videogörüntü çoxdan lentə alınıb.