Ukrayna Rusiyanın beş ən böyük neft emalı zavodunu vurdu

Oktyabrın 30-dan etibarən Ukraynanın uzaqmənzilli zərbələri Rusiyanın beş ən böyük neft emalı zavoduna – Omsk, Kiriş, Ryazan, Nijni Novqorod və Yaroslavl neft emalı zavodlarına çatıb. Həmçinin Novokuybışevsk və Saratov neft emalı zavodları da hücuma məruz qalıb.

Bizim.Media xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Belə ki, noyabrın 11-də Ukrayna bölmələri Ukrayna sərhədindən təxminən 2500 kilometr məsafədə yerləşən Omsk neft emalı zavodunu vurub.

Baş Qərargah Kiriş və Saratov neft emalı zavodlarına edilən hücumların nəticələrini də təsdiqləyib.

Noyabrın 9-na keçən gecə Leninqrad vilayətində yerləşən Kiriş neft emalı zavodunda ilkin neft emalı qurğuları və iki soyutma qurğusu zədələnib. İllik gücü təxminən 20 milyon ton olan müəssisə Rusiyanın ümumi neft emalının 6 faizindən çoxunu təmin edir.

Noyabrın 7-də isə illik təxminən 7 milyon ton neft emalı gücünə malik Saratov neft emalı zavoduna zərbə endirilib. Nəticədə yeganə ilkin neft emalı qurğusu, iki yanacağın hidrotəmizlənməsi qurğusu, boru kəmərləri və 10 min kubmetr tutumlu yanğın baş verən rezervuar zədələnib. Müəssisənin fəaliyyəti dayandırılıb.

Ukrayna Silahlı Qüvvələrinin Baş Qərargahının qiymətləndirməsinə görə, ilkin neft emalı qurğularına endirilən zərbələr Rusiya ordusu üçün yanacaq istehsalını və Moskvanın müharibəni maliyyələşdirdiyi gəlirləri azaldır.

“Məsafə artıq xilas etmir: istər Sibir, istərsə də Rusiya Federasiyasının daha yaxın bölgələri olsun, Ukrayna döyüşçüləri düşməni müharibəni hazırladığı yerdə vururlar”, – deyə Baş Qərargahın məlumatında bildirilir.

Bizim.Media