Dubayda əmirliyin hökmdarı şeyx Məhəmməd bin Rəşid Al-Maktumun kiçik qardaşı şeyx Əhməd bin Rəşid Al-Maktum vəfat edib. Bununla əlaqədar 10 günlük matəm elan edilib. Sentyabrın 21-dən 30-dək əmirlikdə bayraqlar yarıyadək endiriləcək.
Bizim.Media xəbər verir ki, yaxın günlərdə Dubaya səfər edəcək turistlər üçün bu, kurort və turizm infrastrukturunun fəaliyyətinin dayandırılması demək deyil.
Matəm elan edilməsi avtomatik olaraq otellərin, mağazaların, restoranların və ya görməli yerlərin bağlanmasını nəzərdə tutmur.
Bununla belə, turistlər əyləncə proqramında mümkün dəyişiklikləri nəzərə almalıdırlar. Rəsmi matəm dövründə kütləvi konsertlər və digər tədbirlər ləğv edilə və ya təxirə salına bilər. Artıq sentyabrın 25-nə planlaşdırılan və K-pop ifaçılarının çıxışlarının nəzərdə tutulduğu Dubai K-Fest festivalının açılışının təxirə salındığı məlumdur. Yeni tarixlər təşkilatçılar tərəfindən daha sonra açıqlanacaq.
Ayrı-ayrı ekskursiya proqramlarına da düzəlişlərin edilməsi istisna olunmur. Xüsusilə, həmin proqramlara şoular və ya digər əyləncə tədbirləri daxil edilibsə, dəyişikliklər edilə bilər. Bununla belə, Dubayın məşhur turizm obyektlərinin bağlanması ilə bağlı hələlik heç bir təsdiqlənmiş məlumat yoxdur.
Məsələn, Emaar şirkətinin rəsmi məlumatında Burj Khalifa yaxınlığındakı Dubai Fountain-ın – su, işıq və musiqi şousunun – nümayiş cədvəli hələ də yer alır.
Onun ləğv edilməsi və ya musiqisiz rejimə keçirilməsi barədə hələlik məlumat verilməyib.
Yaxın günlərdə konsertlərə, şoulara və digər tədbirlərə getməyi planlaşdıran turistlərə səfərdən əvvəl həmin tədbirlərin keçirilib-keçirilməyəcəyini əlavə olaraq yoxlamaq tövsiyə olunur.
Bizim.Media
