Sosial şəbəkələr insanların gündəlik həyatında mühüm yer tutur. İnsanlar sosial şəbəkələrdən müxtəlif məqsədlərlə istifadə edir. Kimi burada dostları ilə əlaqə saxlayır, kimi dünyada baş verən hadisələri izləyir, kimi də məzmun paylaşaraq, konkret kontent yaradaraq gəlir əldə edir.
Sosial media hesablarında paylaşılan məlumatlar isə bəzən şəxsin peşəkar fəaliyyəti ilə yanaşı, şəxsi baxışları və həyat tərzi haqqında da fikir formalaşdırır.
Bu səbəbdən bəzi işəgötürənlər namizədləri daha yaxından tanımaq üçün onların sosial şəbəkə hesablarına nəzər salırlar.
Həmçinin, işə qəbul zamanı namizədlərin peşəsi, bacarığı ilə bərabər şəxsi həyatı, onun maraq dairəsi də işəgötürənləri maraqlandırır. Bəzi hallarda sosial şəbəkələr bu məlumatları toplamaqda işəgötürənlərə kömək edə bilir. Lakin iş üçün müraciət edənlərin, hətta iş zamanı belə şəxslərin sosial şəbəkədi davranışlarının araşdırılması, dəyərləndirilməsi müzakirə mövzusu olaraq qalır. Bunun etik, eyni zamanda hüquqi tərəfləri sualalr yaradır.
MÖVZU İLƏ BAĞLI:
Bu şəxslərin əmək müqaviləsinə XİTAM VERİLƏCƏK
Bəs işə qəbul prosesi zamanı namizədlərin sosial şəbəkə hesablarının yoxlanılması hüquqi baxımdan nə dərəcədə əsaslıdır və bu, hüquq pozuntusu hesab oluna bilərmi?
Mövzu ilə bağlı Bizim.Media-ya açıqlamasında hüquqşünas Şamil Paşayev bildirib ki, müasir texnologiyalar həyatımızı asanlaşdırsa da, onların istifadəsi fərdi hüquqların qorunması ilə bağlı müəyyən narahatlıqlar yaradıb:
“21-ci əsrin daha çox azadlıqlar əsri olacağı güman edilirdi, ancaq texnologiyanın inkişaf etməsi insanlara rahatlıq gətirməklə yanaşı, onların fərdi hüquqlarının, azadlıqlarının qısıtlanmasına da şərait yaradıb. Yəni, hazırda dünyada təhlükəsizlik məqsədilə müşahidə kameraları, radar sistemi tətbiq olunur.
Dünyanın inkişaf etmiş ölkələrində hər hansı bir maşının mülki və yaxud da inzibati pozuntusunun olub-olmaması texnologiyanın hesabına avtomatik şəkildə yoxlanır. Bütün bunlar təkcə təhlükəsizlik adı altında həyata keçirilir, amma əslində, bunların bir çoxu insanların hüquq və azadlıqlarının pozulmasına gətirib çıxaran hallardır”.
O hesab edir ki, insanların sosial şəbəkələrdəki davranışları onların real həyatına təsir edir:
“Sosial şəbəkələrdən istifadə də insanlara virtual məkanların real həyata transformasiyası kimi qiymətləndirilir və sosial şəbəkədəki davranışları insanların həyatına təsir edir. Bəzi ölkələr hətta viza verərkən də insanların sosial şəbəkələrdəki davranışlarına baxırlar. Bu isə onların öz siyasi düşüncələrinə uyğun olaraq interpretasiya edirlər. İnsanların sosial şəbəkələrdə paylaşdıqları fikir və ya şəkillərə görə mühakimə olunması və bunlara görə onların işə qəbul olunması və ya işdən azad olunması tamamilə qanunsuz və əsassızdır.
Əvvəllər bunu bir çox ölkələrdə, bir çox şirkətlər və yaxud da qurumlar gizli şəkildə həyata keçirirdilər. Bu gizli də olsa, açıq şəkildə də olsa qanun pozuntusudur. Amma hazırda bunu bəzi elanlarda açıq şəkildə yaza və deyə bilirlər. Bütün bunlar insanların hüquq və azadlıqlarının pozulmasına yönəlik hərəkətlərdir. Sosial şəbəkələrdə şəxslərin davranışlarına və paylaşımlarına əsasən işə qəbul zamanı onlara üstünlük verilməsi və ya verilməməsi hüquq və qanun pozuntusu hesab oluna bilər”.
Günay Şahmar, Bizim.Media
