Misirin paytaxtı Qahirə yaxınlığında baş vermiş silahlı hücumda 9 polis əməkdaşı dünyasını dəyişib. ANS PRESS-in məlumatına görə, hadisə Heluan şəhərində baş verib.
Bir qrup maskalı şəxs avtomat silahlarla içərisində polislərin olduğu xidməti mikroavtobusu atəşə tutub. Nəticədə biri kapitan olmaqla 9 polis zabiti həlak olub.
Başda kapitan Məhəmməd Həmid olmaqla qalan 8 zabitin hər biri Heluan istintaq idarəsinin əməkdaşı olub.
İlkin məlumatlara əsasən hücum edənlərin sayı 4 nəfər olub. Şübhəli şəxslər tapşırıqdan geri qayıdan mikroavtobusu pikapla izləyib.
Əvvəlcədən planla təyin edilmiş nöqtəyə çatdıqda atəş açılıb. Təhlükəsizlik orqanları hadisə yerindən 40-a yaxın patron gilizi aşkar edib.
Şəhərdə gücləndirilmiş təhlükəsizlik tədbirləri görülüb. Bir neçə rayona giriş və çıxışlar məhdudlaşdırılıb. Hadisə baş vermiş yerlə kəsişən bütün küçələr bağlanıb. Qahirədən cənuba gedən bütün avtomagistrallar yoxlanılır. Şübhəlilərin axtarışı davam edir.
Bəzi hadisə şahidlərinin sözlərinə görə, maskalılar İŞİD terror qruplaşmasının üzvləri olub. Mikroavtobusa hücum etmiş pikapın şüşəsində qruplaşmanın rəmzi görünüb.
