İranın yeni Ali Rəhbəri Müctəba Xamenei keçmiş ali rəhbər və atası Əli Xameneinin dəfn mərasimi münasibətilə bəyanat yayıb.
Bizim.Media xəbər verir ki, Ali lider atasının qisasını alacağına and içib:
"Şəhidlik zirvəsinə ucalmış rəhbərimizə deyirəm: Sənin təmiz qanının və bu iki müharibənin bütün şəhidlərinin qanının qisasını o cinayətkar, rüsvay olmuş qatillərdən alacağımıza and içirik.
Bu intiqam millətimizin tələbidir və mütləq reallaşacaq. Adları ən yüksək rütbələrdən ən aşağısına qədər bəlli olan bu cinayətkarlar öz çarpayılarında dinc şəkildə ölmək ümidini gerçəkləşdirə bilmədən qəbirlərinə aparacaqlar.
Onlar bilməlidirlər ki, bu iş mənim və ya hər hansı digər rəsmi şəxsin varlığından asılı deyil. Biz burada bərqərar olsaq da, olmasaq da, bu hökm icra ediləcək. Tezliklə bütün dünya üzrə azadlıqsevər xalqların arasından çıxan insanlar bu ilahi missiyanın hər biri özünə aid olan hissəsini yerinə yetirəcək".
Xatırladaq ki, İranın ali rəhbəri Əli Xamenei 28 fevral 2026-cı il tarixində ABŞ və İsrailin birgə hava hücumu nəticəsində Tehrandakı iqamətgahında öldürülüb.
Hücum zamanı Xamenei ilə yanaşı, onun ailə üzvləri, o cümlədən qızı və nəvəsi də həlak olub.
Bu hadisədən sonra İranda rəsmi olaraq onun ölümü təsdiqlənib və ölkədə uzun sürən matəm və dəfn mərasimləri keçirilib.
Bizim.Media
