ABŞ Rusiyanın A7 ödəniş sisteminə sanksiya TƏTBİQ ETDİ

ABŞ Rusiyanın A7 ödəniş sisteminə qarşı sanksiyalar tətbiq edib. Vaşinqton bu sistemin İranın sanksiyalardan yayınmasına kömək etdiyini bildirib.

Bizim.Media xəbər verir ki, bu barədə ABŞ Maliyyə Nazirliyi məlumat yayıb.

Nazirliyin açıqlamasına görə, A7 şəbəkəsi sanksiyalarla və ya qanunsuz fəaliyyətlə əlaqəli ödənişləri adi kommersiya əməliyyatları kimi göstərmək üçün saxta ticarət sənədlərindən, idxal və ixracla bağlı saxtalaşdırılmış məlumatlardan və məhsulların yanıltıcı təsvirlərindən istifadə edib.

ABŞ Maliyyə Nazirliyi həmçinin A7-nin subagentlərinin İran neftinin satışına və silah alışına yardım etdiyini bildirib.

Məlumata görə, A7-nin subagentlərindən biri İranın “kölgə donanması” ilə əlaqəli qurumlarla əməliyyatlar aparıb. Həmin subagent və onunla əlaqəli şirkət sanksiyalardan yayınan təşkilatlardan ümumilikdə 140 milyon dollara yaxın vəsait əldə edib.

Nazirliyin məlumatına görə, A7-nin digər subagenti isə İran sanksiyalarından yayınma və silah tədarükü ilə əlaqəli şirkətə təxminən 1,6 milyon dollar köçürüb.

Bizim.Media