ABŞ Prezidenti Donald Tramp Tehranın Hörmüz boğazından keçən gəmilərdən rüsum almağa başlayacağı təqdirdə İranla danışıqları dayandıracağı ilə hədələyib.
Bizim.Media xəbər verir ki, Ağ Evin rəhbəri bu barədə "Truth Social" sosial şəbəkəsində yazıb.
Eyni zamanda, Trampın sözlərinə görə, ABŞ mediada yayılan xəbərlərin əksinə olaraq, Tehranın Hörmüz boğazından keçən gəmilərdən heç bir rüsum tələb etməyəcəyinə dair İrandan təminat alıb.
“İran ABŞ-yə məlumat verib ki, yalançı medianın aldadıcı xəbərlərinə baxmayaraq, “İran Hörmüz boğazından keçən gəmilərdən heç bir rüsum, sığorta ödənişi və ya hər hansı digər ödəniş tutmur və almır”. Əgər bu məlumat yalan çıxsa, danışıqlar dərhal dayandırılacaq.
Bundan başqa, ABŞ İrana heç bir pul vəsaiti köçürməyib və onun heç bir aktivini dondurmadan azad etməyib.
Biz İrana məxsus, tamamilə bizim nəzarətimizdə olan vəsaitlərin bir hissəsini azad etməyə hazırlaşırıq ki, həmin pullar fermerlərimizə qarğıdalı, buğda, soya paxlası və digər məhsulların alınması üçün yönəldilsin. İranın ərzağa kəskin ehtiyacı var və biz bu ölkə üçün onu yalnız ABŞ-dən alacağıq", - Tramp paylaşımında qeyd edib.
Qeyd edək ki, iyunun 18-də ABŞ və İran hərbi əməliyyatların dayandırılmasını təsbit etməli və danışıqların yeni mərhələsinə start verməli olan müvəqqəti anlaşma memorandumu imzalayıblar.
Sənəd 60 gün müddətinə hesablanıb. Bura hərbi əməliyyatların dayandırılması, Hörmüz boğazı vasitəsilə gəmiçiliyin bərpası və ABŞ tərəfindən İran limanlarının dəniz blokadasının qaldırılması daxildir.
Bizim.Media
