Zelenski ikinci dəfə prezidentliyə namizəd olacaq – KİV

Ukrayna Prezidenti Volodimir Zelenski ikinci dəfə prezidentliyə namizəd olmaq qərarına gəlib.

Bizim.Media xəbər verir ki, bu barədə Ukraynanın “Teleqraf” nəşri Zelenskiyə yaxın mənbələrə istinadən məlumat yayıb.

Hələlik bu məlumat rəsmi olaraq təsdiq və ya təkzib olunmayıb.

“İkinci müddətlə bağlı qərar qəbul olunub. 52% etimad səviyyəsi ilə Zelenskinin hələ də prezident seçkilərində qalib gəlmək şansı var”, - məlumatda qeyd olunub.

Nəşrin məlumatına görə, hazırda Zelenskinin qələbə qazanmaq şansı yalnız onun əsas rəqibi olan Ukrayna Silahlı Qüvvələrinin keçmiş baş komandanı Valeri Zalujnının namizədliyini irəli sürmədiyi halda var. Bildirilib ki, Zalujnı hələ siyasi gələcəyi ilə bağlı yekun qərar verməyib.

Qeyd edək ki, Zelenskinin prezident səlahiyyətləri 2024-cü il mayın 20-dən sonra rəsmən başa çatıb. Ölkədə hərbi vəziyyət olduğundan parlament və prezident seçkiləri keçirilmir.

Bizim.Media