Uşakov: “Putin, Uitkoff və Kuşnerin görüşü konstruktiv və faydalı olub”

Rusiya Prezidenti Vladimir Putinin ABŞ nümayəndələri Stiv Uitkoff və Cared Kuşnerlə görüşü məzmunlu, konstruktiv və faydalı olub.

Bizim.Media xəbər verir ki, bunu Rusiya Prezidentinin köməkçisi Yuri Uşakov bildirib. O, görüşün yekunları ilə bağlı bir sıra açıqlamalar verib.

Uşakovun sözlərinə görə Rusiya Avropanın təhlükəsizliyi ilə bağlı təklifləri ABŞ-la birlikdə müzakirə etməyə dərhal başlamağa hazırdır: 

“Moskvanın Avropanın təhlükəsizliyi ilə bağlı yeni təklifləri var. ABŞ nümayəndələri Putinin Konstantinovkada humanitar missiyanın təşkili təklifini fəal şəkildə dəstəkləyiblər. Rusiya humanitar missiyanın həyata keçirilməsi üçün Konstantinovkada minatəmizləmə işlərinə dərhal başlamağa hazırdır”.

O həmçinin bildirib ki, humanitar missiya şəhərin faktiki olaraq kimin nəzarətində olduğunu hər kəsə göstərməyə imkan verəcək:

“Ən genişmiqyaslı əsir mübadiləsinin parametrləri hazırda razılaşdırılır. Eləcə də Uitkoff və Kuşnerlə görüşdə Zelenskinin davranışı və onun Trampa göndərdiyi mesajlar müzakirə olunub. Putin və Tramp Ukrayna münaqişəsinin nizamlanmasını APEC sammiti çərçivəsində planlaşdırılan ikitərəfli görüşdə müzakirə etməyə davam edəcəklər”.

Sonda Uşakov vurğulayıb ki, Kreml Uitkoff və Kuşnerin Putinlə görüşdə verilən mesajları Zelenskiyə çatdıracağına ümid edir.

Bizim.Media