Japarov: Ərdoğan Qırğızıstanın Türkiyəyə olan xarici borcunu sildi

2024-cü il noyabrın 5-də Qırğızıstan və Türkiyə liderləri - Sadır Japarov və Rəcəb Tayyib Ərdoğan arasında baş tutan görüşdən sonra mətbuat konfransı keçirilib və ikitərəfli danışıqlara yekun vurulub.

Bizim.Media xəbər verir ki, bu barədə informasiyanı Tazabek nəşri yayıb.

Xatırladaq ki, Türkiyə prezidenti noyabrın 4-dən 6-dək Qırğızıstanda dövlət səfərində olacaq.

Sadır Japarov çıxışı zamanı ölkənin Türkiyəyə olan xarici borcunun silindiyini açıqlayıb.

“Qırğızıstanın Türkiyəyə olan xarici borcunu silmək qərarına görə prezident Ərdoğana minnətdarlığımı bildirmək istəyirəm”, - Sadır Japarov bildirib.

Belə ki, Türkiyə Respublikası yaşıl iqtisadiyyat layihələri müqabilində Qırğızıstanın 62,3 milyon dollarlıq xarici borcunu silib. Bundan əvvəl Almaniya da “yaşıl” təşəbbüslərin həyata keçirilməsi müqabilində 14 milyon dollar xarici borcunu silmişdi.

Bizim.Media