Ukrayna ordusu Rusiyada raket yanacağı istehsal edən zavodu vurdu

Ukrayna Silahlı Qüvvələri Rusiyanın Rostov vilayətində raket yanacağı istehsal edən “Kamenski” kombinatına zərbə endirib.

Bizim.Media xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Bildirilib ki, hücum oktyabrın 31-nə keçən gecə həyata keçirilib. Zərbə nəticəsində müəssisənin hazır məhsul anbarında yanğın baş verib, dörd istehsalat sexinə ziyan dəyib.

Əməliyyatda pilotsuz uçuş aparatlarından və Ukrayna Hərbi Dəniz Qüvvələrinin raket qoşunlarından istifadə olunub. Hücum zamanı, xüsusilə, “Neptun” sahil raket kompleksləri cəlb edilib.

“Kamenski” kombinatı bərk raket yanacağının istehsalı üzrə ixtisaslaşıb. Bu yanacaq “Uraqan”, “Smerç” və “Tornado-S” reaktiv yaylım atəşi sistemlərinin döyüş sursatlarında, eləcə də bir sıra raket sistemlərində və aviasiya silahlarında istifadə olunur.

Bizim.Media