Almaniyada kütləvi etiraz həyəcanı: Polis həyəcan siqnalı verdi - Video

Almaniyada bu gün “Z nəsli”nin kütləvi etiraz aksiyalarının keçirilməsi gözlənilir. Polis mümkün iğtişaşların qarşısını almaq üçün təhlükəsizlik tədbirlərini gücləndirir.

Bizim.Media xəbər verir ki, ölkə üzrə “Gen Z regelt” (“Z nəsli qərar verir”) hərəkatının təşkilatçılığı ilə 35 etiraz aksiyasının keçirilməsi planlaşdırılır.

Ən böyük aksiyaların Berlin, Köln, Frankfurt, Ştutqart, Hamburq, Düsseldorf və Münhendə baş tutacağı gözlənilir.

Etirazçılar yaşayış xərclərinin artmasına, məcburi hərbi xidmətin yenidən tətbiqi ehtimalına və dövlət nəzarətinin gücləndirilməsinə qarşı çıxırlar. Onlar, həmçinin iqlim dəyişikliyi ilə mübarizənin daha da fəallaşdırılmasını tələb edirlər. Təşkilatçıların saytında aksiyalarda iştirak edəcəyini bildirənlərin sayı 160 mini ötüb. 

Polis mümkün qarşıdurmalarla əlaqədar təhlükəsizlik tədbirlərini artırır. Berlində küçələrə əlavə olaraq 1500 hüquq-mühafizə orqanı əməkdaşı çıxarılacaq.

Brandenburq darvazası yaxınlığında keçiriləcək aksiyaya təxminən 10 min nəfərin qatılacağı gözlənilir. Frankfurtda isə solçu ekstremistlərin aksiyalara qoşula biləcəyindən ehtiyat edirlər.

Şəhər mərkəzindəki bəzi mağazalar artıq vitrinlərini taxta lövhələrlə qorumağa başlayıb.

Bununla belə, aksiyaların təşkilatçıları etirazların dinc xarakter daşıyacağını bəyan edərək zorakılığa qarşı olduqlarını bildiriblər.


Bizim.Media