“Binance”a Haker hücumu: Mask günahlandırıldı

Dünyanın ən böyük kriptovalyuta birjası “Binance”ın qurucusu Çanpen Çjao platformaya haker hücumu ilə bağlı yaranmış vəziyyət fonunda amerikalı milyarder İlon Maskdan trollinqə son qoymasını istəyib.

Bizim.Media xəbər verir ki, Çjao daha əvvəl birjanın, ehtimal ki, haker hücumuna məruz qaldığını bildirmiş, bununla belə, istifadəçilərin vəsaitlərinin təhlükəsiz olduğunu vurğulamışdı.

 “Binance” təhlükəsizlik problemləri səbəbindən təxminən 3 milyard dollar dəyərində aktivin dondurulduğunu açıqlayıb.

“İlon, sənə böyük hörmətim var, lakin trollinq üçün uyğun zaman deyil. Xahiş edirəm, bunu dayandır”, – deyə Çjao X sosial şəbəkəsində yazıb.

O, bu sözləri Maskın həmin platformada paylaşdığı posta cavab olaraq qeyd edib. Belə ki, Çjao “Binance”ın haker hücumu nəticəsində yaranan xərcləri qarşılayacağını bildirdikdən sonra Mask sıxılmış dişləri əks etdirən emoji ilə reaksiya verib.

Çjao cavabında birjanın Maskın “Twitter”i (indiki X) satın alması ilə bağlı sövdələşməyə 500 milyon dollar investisiya yatırdığını da xatırladıb. Onun sözlərinə görə, həmin investisiya nəticəsində “Binance”ın əldə etdiyi “SpaceX” səhmlərinin dəyəri hazırda 1 milyard dolları ötüb.

Birjanın qurucusu Maskın bu vəziyyətdə ona kiçik də olsa, dəstək göstərməsini yüksək qiymətləndirəcəyini bildirib.

Bizim.Media