Canlı qüvvə çatışmazlığı Ukraynanı cəbhə xəttində yerüstü robotlaşdırılmış sistemlərdən daha aktiv istifadə etməyə məcbur edir. Bəzi bölmələrdə pilotsuz platformalar artıq əvvəllər hücum qruplarının iştirakını tələb edən tapşırıqları yerinə yetirir, operatorlar isə texnikanı uzaq məsafədə yerləşən komanda məntəqələrindən idarə edirlər.
Bizim.Media xəbər verir ki, bu barədə CNN-in dərc etdiyi məqalədə bildirilir.
Belə bölmələrdən biri də 3-cü ayrıca hücum briqadasının tərkibindəki "NC13" robototexnika və radioelektron mübarizə qrupudur. Ukrayna hərbçilərinin hesablamalarına görə, keçirilən 164 əməliyyat zamanı yerüstü robotların tətbiqi təxminən 2300 hərbi qulluqçunun döyüşə göndərilməsinin qarşısını alıb. Bölmədən bildirilib ki, şiddətli döyüşlər şəraitində bu, yüzlərlə hərbçinin həyatını xilas etməyə kömək edib.
Əvvəllər Donbasdakı döyüşlərdə iştirak etmiş, bölmə komandirinin müavini "Bar" ləqəbli hərbçi bəyan edib ki, bir neçə il əvvəl belə texnologiyalar fantastika kimi görünürdü.
Səssiz partlayıcı daşıyıcılar və pulemyotlu robotlar
CNN-in məlumatına görə, ən effektiv vasitələrdən biri Rusiya mövqelərinə partlayıcı maddələr çatdıra bilən dördtəkərli robotlaşdırılmış platformalar olub. Ukrayna hərbçilərinin izah etdiyinə görə, demək olar ki, tamamilə səssiz işləyən elektrik mühərrikləri sayəsində rus əsgərləri bu aparatları çox vaxt yalnız yaxın məsafədən fərq edə bilirlər.
Cəbhədə həmçinin ağır pulemyotlar və videomüşahidə sistemləri ilə təchiz olunmuş daha böyük tırtıllı robotlardan da istifadə olunur. Belə maşınlar mövqelərdə uzun müddət qala və operatorların idarəetməsi ilə məsafədən atəş aça bilirlər.
Pilotsuz yerüstü platformalardan döyüş sursatı, su və ərzaq çatdırılması, eləcə də yaralıların təhlükəli zonadan təxliyə edilməsi üçün də tez-tez istifadə olunur. Bəzi hallarda bu aparatlar əvvəlcədən hazırlanmış xəritələrdən istifadə edərək bir neçə saat davam edən marşrutları qət edirlər.
Müasir dövrün ən texnoloji müharibəsi
Ekspertlər qeyd ediblər ki, robotlaşdırılmış sistemlərin kütləvi tətbiqinə keçid Ukraynanın dörd ildən artıq davam edən müharibədən sonra qarşılaşdığı demoqrafik və hərbi məhdudiyyətlərin nəticəsidir. Rusiya ordusunu yeni səfərbər olunanlar və müqaviləli hərbçilərlə doldurduğu bir vaxtda, Kiyev canlı qüvvə itkisini azaltmağa imkan verən texnologiyalara mərc edir, deyə nəşrdə qeyd olunur.
"Yerüstü robotlar piyadaların hətta ən elementar tapşırıqlarını belə əvəz edir... Ukraynada avtomatlaşdırmanın sürəti və miqyası heyrətamizdir. Bir neçə ay ərzində pilotsuz aparatlar nadir tapılan qabaqcıl yeniliklərdən standart silaha çevrilib. Bu robotlar yaralıları xilas edir və ya cəbhə xəttindəki qoşunları təchiz edirlər", – deyə məqalə müəllifi yazır.
Ukrayna hərbçiləri etiraf edirlər ki, texnoloji üstünlük daimi deyil. Hər iki tərəf radioelektron mübarizə vasitələrini, pilotsuz sistemləri və proqram təminatını inkişaf etdirməyə davam edir, bu isə münaqişəni müasir dövrün ən texnoloji müharibələrindən birinə çevirir.
Bizim.Media
