Trampın keçmiş gəlini xərçəngə yoluxdu

ABŞ Prezidenti Donald Trampın böyük oğlu Donald Trampın (kiçik) keçmiş həyat yoldaşı Vanessa Tramp onda döş xərçəngi (döş vəzisi karsinoması) aşkarlandığını elan edib.

Bizim.Media xəbər verir ki, bu barədə "Daily Mail" nəşri məlumat yayıb.

48 yaşlı Vanessa Tramp sosial şəbəkə hesabında xəstəliyin ilkin mərhələdə (I mərhələ) aşkar edildiyini bildirib.

O, profilaktik müayinə zamanı bu diaqnozun qoyulduğunu və artıq müalicə prosesinə başladığını qeyd edib.

"Mən bu xəbəri gizlətmək istəmirəm, çünki bütün qadınları vaxtında mammoqrafiya müayinəsindən keçməyə və sağlamlıqlarına qarşı diqqətli olmağa çağırmaq niyyətindəyəm. Erkən diaqnoz həyat xilas edir", — deyə keçmiş model vurğulayıb. O, həmçinin bu çətin günlərdə ailəsinin və beş övladının ona böyük dəstək olduğunu əlavə edib.

Xatırladaq ki, Vanessa və Donald Tramp (kiçik) 2005-ci ildə evləniblər və bu evlilikdən onların 5 övladı dünyaya gəlib.

Cütlük 2018-ci ildə rəsmi olaraq boşansa da, övladlarının tərbiyəsi üçün dostluq münasibətlərini qoruyub saxlayıblar.

Bizim.Media