Solovyov Viktoriya Bonyadan üzr istədi – VİDEO

Rusiyalı teleaparıcı Vladimir Solovyov bloger Viktoriya Bonya haqqında səsləndirdiyi fikirlərə görə ondan üzr istəyib.

Bizim.Media xəbər verir ki, o, "Solovyov LIVE" verilişində Viktoriya Bonya haqqında dediyi sözlərdən sonra haqsız olduğunu və həddindən artıq emosionallığını etiraf edib.

"Bəli, əlbəttə ki, üzr istəməliyəm. Əlbəttə ki, çox emosional idim", - deyə aparıcı bildirib.

O, canlı yayım zamanı sözlərində daha diqqətli olmalı olduğunu qeyd edib.

Qeyd edək ki, Viktoriya Bonya bu yaxınlarda sosial şəbəkə vasitəsilə Rusiya Prezidenti Vladimir Putinə videomüraciət yayımlamışdı.

Müraciətdə o, internet məhdudiyyətlərini, Dağıstandakı daşqınlardan sonra rəsmilərin hərəkətsizliyini və ölkədəki bir sıra problemə toxunaraq tənqid edib.

Bir neçə gün sonra isə V.Solovyov öz verilişində Viktoriya Bonyanı səsləndirdiyi tənqidi fikirlərinə görə təhqir edib.

O, həmçinin İstintaq Komitəsindən, Ədliyyə Nazirliyindən və Baş Prokurorluqdan onun ifadələrinə hüquqi qiymət vermələrini tələb edib.

Xatırladaq ki, Solovyov öz verilişində İtaliyanın Baş naziri Corciya Meloni haqqında da təhqiramiz fikirlər səsləndirmişdi.


Bizim.Media