Ən şirin yemişi necə seçmək olar? - 6 əsas əlamət

Yay aylarında ən çox sevilən meyvələrdən biri olan yemişin şirin və yetişmiş olub-olmadığını onu almadan əvvəl müəyyən etmək mümkündür. Bunun üçün meyvənin görünüşünə, qoxusuna və çəkisinə diqqət yetirmək kifayətdir.

Bizim.Media xəbər verir ki, ilk növbədə qabığında çat və cızıq olan yemişləri almaq məsləhət deyil.

Belə zədələr vasitəsilə bakteriyalar meyvənin içərisinə keçə bilər. Artıq doğranmış yemişlərə də ehtiyatla yanaşmaq lazımdır. Onların hansı şəraitdə doğrandığını bilmək çətin olduğundan, belə məhsulu aldıqdan sonra mümkün qədər tez, ən geci bir gün ərzində yemək tövsiyə olunur.

Şirin yemişi necə tanımaq olar?

1. Qoxusuna diqqət edin

Yetişmiş yemişi müəyyən etməyin ən sadə yollarından biri onun qoxusunu yoxlamaqdır. Balı və ya yetişmiş armudu xatırladan xoş ətir yemişin yetişdiyini göstərir. Ot qoxusu meyvənin hələ yetişmədiyinə, ümumiyyətlə qoxusunun olmaması isə onun yetişdirilmə şəraiti ilə bağlı problem ola biləcəyinə işarə edə bilər.

2. Yemişə yüngülcə vurun

Meyvəyə barmaqla yüngülcə vurduqda küt səs eşidilməsi yaxşı əlamət hesab olunur. Daha cingiltili səs yemişin yetişmədiyini göstərə bilər.

3. Qabığını yoxlayın

Yetişmiş yemişin qabığı əsasən bərabər rəngdə olmalıdır. Yaşıl hissələrin qalması meyvənin tez dərildiyini göstərə bilər. Qəhvəyi və tünd ləkələr isə çürümə prosesinin başladığından xəbər verə bilər.

4. Saplağına baxın

Yemişin saplağı qalıbsa, onun vəziyyətinə də diqqət yetirmək lazımdır. Quru və saralmış saplaq meyvənin yaxşı yetişdiyini göstərən əlamətlərdən biridir.

5. Doğranmış yemişin rəngini yoxlayın

Əgər yemiş artıq doğranmış halda satılırsa, onun içərisinə baxmaq mümkündür. Yetişmiş meyvənin lətinin rəngi daha parlaq sarı olmalıdır. Qabığın yaxınlığında yaşıl rəngin qalması yemişin tam yetişmədiyini göstərə bilər.

6. Daha ağır olanı seçin

Eyni ölçüdə bir neçə yemiş arasında seçim edərkən daha ağır olan meyvəyə üstünlük vermək məsləhətdir. Belə yemişin daha şirəli olması ehtimal edilir.

Mütəxəssislərin sözlərinə görə, bu əlamətləri birlikdə nəzərə almaq ən şirin və yetişmiş yemişi seçmək şansını artırır. Meyvə bağında yetişmiş yemişi müəyyən etmək üçün isə saplağın tam quruması və yemişdən xoş, şirin qoxunun gəlməsi əsas göstəricilərdən sayılır. (Demokrat.az)

Bizim.Media