Şəkərsiz mürəbbə reseptləri: Həm sağlam, həm dadlı

Qışa hazırlıq mövsümündə bir çox ailə mürəbbə bişirməyə başlayır. Lakin şəkərdən istifadə etməyənlər, diabet xəstələri və sağlam qidalanmağa üstünlük verənlər üçün klassik mürəbbələr hər zaman uyğun olmur. Mütəxəssislər bildirirlər ki, təbii məhsullarla hazırlanan şəkərsiz meyvə cemi daha sağlam alternativ ola bilər.

Bizim.Media  şəkər əlavə edilmədən hazırlanan iki fərqli cem reseptini təqdim edir.

Qeyd: Bal da təbii şəkər mənbəyidir. Diabet xəstələri və azyaşlı uşaqlar üçün bu reseptlərdən istifadə etməzdən əvvəl həkim və ya dietoloq məsləhəti almaq tövsiyə olunur. Bir yaşından kiçik körpələrə isə bal verilməsi məsləhət görülmür.

Şəkərsiz çiyələk cemi

Lazım olan ərzaqlar

4 stəkan əzilmiş çiyələk

1 stəkan təbii bal

1/4 stəkan təzə sıxılmış limon suyu

3/4 stəkan su

Hazırlanma qaydası

Əvvəlcə çiyələyi bal ilə qarışdırın. Suyu qaynadın və meyvə qarışığını suya əlavə edin. Daha sonra limon suyunu tökün və bütün ərzaqları blenderlə püre halına gələnədək qarışdırın.

Hazır cemi soyuduqdan sonra steril şüşə bankaya dolduraraq soyuducuda saxlayın.

Şəkərsiz portağal cemi

Lazım olan ərzaqlar

5 ədəd orta ölçülü portağal

4 xörək qaşığı təbii bal

Hazırlanma qaydası

Portağalları 8 dəqiqə qaynar suda bişirin. Soyuduqdan sonra qabığını təmizləyin, tumlarını çıxarın və meyvənin ətli hissəsini blenderdən keçirin.

Alınan qarışığın üzərinə bal əlavə edin və zəif odda təxminən 25 dəqiqə qarışdıraraq bişirin. Soyuduqdan sonra steril bankaya doldurub soyuducuda saxlayın.

Mütəxəssislər bildirirlər ki, ev şəraitində hazırlanan cemlərdə konservant və süni qatqılar olmadığından onların saxlanma müddəti klassik mürəbbələrdən daha qısa olur. Buna görə də belə məhsulların kiçik porsiyalarla hazırlanması və soyuducuda saxlanılması tövsiyə edilir. (demokrat.az)

Bizim.Media