“Zeyxur” komandası respublika üzrə ikinci oldu - FOTO

Cari ilin 28 aprel – 06 may tarixlərində Dövlət Sərhəd Xidmətinin “N” saylı hərbi hissəsində Azərbaycan Respublikasının Dövlət Sərhəd Xidməti, Elm və Təhsil Nazirliyi və Gənclər və İdman Nazirliyinin birgə təşkilatçılığı ilə “Sərhəd” hərbi-idman oyunlarının final mərhələsi keçirilib.

Bizim.Media xəbər verir ki, hərbi-idman oyunlarında respublikanın 36 rayon və şəhərindən 181 ümumtəhsil məktəbinin 905 şagirdi iştirak edib.
 

Yarışın final mərhələsinin nəticələrinə əsasən Qusar rayon Yuxarı Zeyxur kənd tam orta ümumtəhsil məktəbinin “Zeyxur” komandası final mərhələsinə vəsiqə qazanmış 11 komanda arasında II yerdə qərarlaşıb.

Yarış müddətində iştirakçılar sərhədçilərin xidməti-döyüş fəaliyyəti və məişət şəraiti ilə yaxından tanış olmuş, ekskursiyalarda, mədəni-kütləvi tədbirlərdə, hərbi bilik və idman yarışlarında fəal iştirak ediblər.

Qusar Rayon İcra Hakimiyyəti başçısı Aparatın adından parlaq qələbə münasibətilə rayonun idman ictimaiyyətini, Yuxarı Zeyxur kənd tam orta məktəbinin kollektivini, “Zeyxur” komandasının bütün üzvlərini təbrik edib, onlara gələcək fəaliyyətlərində uğurlar arzu edib.