Ukrayna Tatarıstandakı PUA anbarını belə məhv etdi – ANBAAN VİDEO

Bu gün səhər saatlarında Ukrayna Təhlükəsizlik Xidmətinin “A” Xüsusi Əməliyyatlar Mərkəzinin uzaqmənzilli pilotsuz uçuş aparatları (PUA) Tatarıstan Respublikasının Kizil-Yul yaşayış məntəqəsində yerləşən logistika mərkəzinə zərbə endirib.

Bizim.Media xəbər verir ki, bu barədə Ukrayna Təhlükəsizlik Xidmətinin məlumatında qeyd olunub.

Məlumata görə, həmin mərkəzdə istifadəyə hazır “Şahed” kamikadze dronları və onlara aid xarici komplektlər saxlanılırdı.
 

Yayılan videogörüntülərdə PUA-nın mərkəz binasına dəyməsi və ardınca yanğın baş verməsi əks olunub. Məlumata görə, buraxılış nöqtəsindən hədəfə olan məsafə təxminən 1300 kilometr olub.

SBU bildirib ki, Ukraynanı hər gecə hədəfə alan “Şahed” dronlarının saxlandığı anbarlar qanuni hərbi hədəflərdən biridir:

“Hər belə uğurlu xüsusi əməliyyat düşmənin işğalçı müharibə aparmaq imkanlarını azaldır”.
 

Qeyd edək ki, sosial şəbəkələrdə “Şahed” istehsalı ilə bağlı obyektlərə zərbələr və yanğınlar barədə məlumatlar yayılıb.

Ukraynalı analitiklərin sözlərinə görə, Yelabuqa şəhərindəki “Şahed” yığma sexlərinə “Lütıy” tipli dronlarla hücum edilib. Yelabuqa Rusiya zərbə PUA-larının istehsal mərkəzlərindən biridir.


Bizim.Media