Almaniyada turnir zamanı ildırım idmançıları vurdu

Almaniyanın Raştatt şəhərindəki kempinq sahəsinə ildırım düşməsi nəticəsində doqquz nəfər xəsarət alıb, onlardan birinin vəziyyəti ağırdır.

Bizim.Media xəbər verir ki, bu barədə "Bild" tabloidi məlumat yayıb.

Hadisə ötən axşam 120 komandanın iştirakı ilə həndbol turnirinin keçirildiyi idman meydançasında baş verib. Gecə saatlarında idmançılar yaxınlaşan fırtına öncəsi çadırları möhkəmləndirərkən ildırım dalğası birbaşa onların yaxınlığına düşüb. 

Xəsarət alanlardan altı nəfər xəstəxanaya yerləşdirilib ki, onların arasında 13 yaşlı bir yeniyetmə də var. Bir nəfər ağır xəsarətlər alsa da, həyatı üçün təhlükə yoxdur.

Raştatt polisi hadisə ilə bağlı araşdırmalara başlayıb. İstintaq əlverişsiz hava şəraiti zamanı turnir iştirakçılarının mühafizəsinin nəzərdə tutulub-tutulmadığını və təhlükəsizlik tədbirlərinin necə təmin edildiyini aydınlaşdırır. İstintaqa idman tədbirinin təşkilatçıları da daxil olacaq.

Bizim.Media