Həftənin şənbə günü İlham Əliyevin parlamentdə inaqurasiya mərasimi keçirildi. Diqqətçəkən bir məqam da mərasimdə dövlət himninin səsələndirilməsi zamanı demək olar ki, heç kimin onu oxumaması oldu. Tanınmış hüquqşünas, “Miqrantlara Hüquqi Yardım” İctimai Birliyinin rəhbəri Əlövsət Əliyev də parlamentdəki inaqurasiya mərasimini izləyərkən gördüklərindən üzülənlər arasındadır. Moderator.az-a açıqlamasında hüquqşünas çıxış yolu kimi cəza tədbirlərinə əl atılmasını təklif edib:
“Azərbaycan Respublikasının Cinayət Məcəlləsinin 324-cü maddəsinə əlavə və dəyişikliklər edilməlidir. Belə ki, həmin maddəyə əlavə və dəyişikliklərdə Azərbaycan Respublikasının Dövlət Bayrağı və Azərbaycan Respublikasının Dövlət Gerbi barədə törədilmiş təhqiredici hərəkətlərə görə cinayət məsuliyyəti nəzərdə tutulub. Məncə rəsmi tədbirlərdə dövlət himnini oxumamaq da himnə münasibətdə təhqiredici əməl kimi qiymətləndirilməlidir. Hesab edirəm ki, bu, Azərbaycan Respublikasının Konstitusiyasının 23-cü maddəsinin də tələbləri baxımından da bu dəyişiklik məntiqli olardı.”
