Ukraynadakı müharibə Pentaqona nümayiş etdirdi ki, müasir münaqişələrdə qələbə təkcə bahalı və yüksək dəqiqlikli silahlarla deyil, həm də silahların sayı (kütləviliyi) ilə qazanılır.
Hazırda ABŞ-ın arsenalında raketlərin sayı o qədər də çox deyil, onların hər biri milyonlarla dollara başa gəlir və tükənən ehtiyatların bərpası illərlə vaxt apara bilər.
Bizim.Media xəbər verir ki, bu barədə nüfuzlu "Financial Times" (FT) nəşri məlumat yayıb.
Nəşrin yazdığına görə, Amerika şirkətləri artıq seriyalı kommersiya komponentlərindən (bütün bazarlarda tapıla bilən hazır detallardan) sadə raketlərin və onların sürətli montajı üçün modul tipli emalatxanaların layihələndirilməsinə başlayıblar.
Məqalədə bu sistem raket istehsalında "McDonald’s modeli" adlandırılır. Yəni, proses maksimum dərəcədə sadə, standartlaşdırılmış və sürətli yığıma əsaslanır.
Milyardlarla dollarlıq büdcə və hədəflər
ABŞ ordusu yeni strategiya çərçivəsində böyük satınalmalara hazırlaşır:
Hərbi Hava Qüvvələri: 5 il ərzində 28 min ədəd raketin alınması üçün 12 milyard dollar vəsait tələb edib.
Quru Qoşunları: Pentaqonun digər bir proqramı çərçivəsində isə 3 il ərzində 10 min ədəd yerüstü raketin alınması nəzərdə tutulur.
"Financial Times" qeyd edir ki, amerikalı hərbi strateqlər müasir müharibələrdə təkcə yüksək texnologiyalı deyil, həm də kütləvi və ucuz silahların həlledici əhəmiyyətə malik olduğu qənaətinə gəliblər. Ukrayna cəbhəsindəki reallıqlar və Yaxın Şərqdəki hərbi əməliyyatların gedişatı bu yanaşmanın doğruluğunu tamamilə təsdiqləyib.
Bizim.Media
