Roma Papası 14 ildən sonra ilk dəfə İspaniyaya getdi

Roma Papası XIV Leo İspaniyaya səfərinin əvvəlində Katolik Kilsəsi daxilindəki cinsi zorakılıq problemini şərh edərək bunun hələ də "açıq bir yara" olaraq qaldığını bəyan edib və qurbanlarla görüşməyi planlaşdırdığını bildirib.

Bizim.Media xəbər verir ki, bu barədə "AFP" agentliyi məlumat yayıb.

70 yaşlı pontifik 2010-cu ildən bəri kilsə rəhbərinin İspaniyaya ilk rəsmi dövlət səfəri çərçivəsində Madridə gəlib. Onu hava limanında Kral VI Felipe, Kraliça Letisiya və Baş nazir Pedro Sançes qarşılayıblar. Təyyarənin göyərtəsində jurnalistlərə açıqlama verən Papa kilsədəki cinsi istismar hallarına toxunaraq, "Bu, hələ də açıq bir yaradır", — deyə vurğulayıb.

Vatikan rəsmiləri də təsdiqləyiblər ki, səfər proqramına katolik din xadimlərinin əməllərindən zərər çəkmiş şəxslərlə görüşlər daxildir.

İspaniya ombudsmanının 2023-cü il hesabatına əsasən, ölkədə 1940-cı ildən bəri təxminən 200 min azyaşlı kilsədə cinsi zorakılığın qurbanı olub. Uzun illər davam edən müqavimətdən sonra, cari ilin mart ayında İspaniya hökuməti ilə Katolik Kilsəsi zərərçəkmişlərə təzminat ödənilməsi barədə razılığa gəliblər.

Səfər çərçivəsində pontifik İspaniya parlamentində çıxış edəcək və Madriddə əksəriyyəti gənclərdən ibarət 400 minə yaxın insanın qatılacağı kütləvi dua mərasiminə rəhbərlik edəcək.

Papanın proqramında miqrasiya mövzusuna da xüsusi yer ayrılıb. O, Kanar adalarını ziyarət edərək miqrantlar və onlara yardım edən təşkilatlarla görüşəcək, həmçinin Baş nazir Sançeslə birlikdə Atlantik okeanı vasitəsilə Avropaya çatmağa çalışarkən həyatını itirən minlərlə insanın xatirəsini yad edəcək. BMT-nin Beynəlxalq Miqrasiya Təşkilatının məlumatına görə, təkcə ötən il bu marşrutda 1100-dən çox insan həlak olub və ya itkin düşüb.

Bizim.Media