Rusiyalı milyarder Vladimir Potanin Londonda növbəti hüquqi zərbə alıb. Məhkəmə onun keçmiş həyat yoldaşının təxminən 5 milyard dollarlıq iddiası üzrə prosesin uzadılması cəhdini rədd edib və işin əlavə mahiyyəti üzrə baxılmasına qərar verib.
Bizim.Media xəbər verir ki, bu barədə Forbes yazıb.
Məlumata görə, hakim Alister Makdonald uzun illərdir davam edən bu mübahisənin başa çatdırılmasının təxirəsalınmaz zərurət daşıdığını bildirib. Qeyd olunub ki, tərəflər indiyədək yalnız hüquqi xidmətlərə təxminən 14 milyon funt-sterlinq, yəni 18,9 milyon dollara yaxın vəsait xərcləyiblər.
İlkin məlumata əsasən, yekun məhkəmə iclası bu ilin noyabr ayına təyin edilib.
İddianı biznesmenin keçmiş həyat yoldaşı, Britaniya vətəndaşlığı alan Natalya Potanina qaldırıb. O, ilk dəfə 2018-ci ilin oktyabrında məhkəməyə müraciət edib və təxminən 5 milyard dollar tələb edir.
Potanina hesab edir ki, Rusiyada boşanma ilə bağlı qəbul olunan əvvəlki məhkəmə qərarları ər-arvadın birgə sərvətinin real miqyasını əks etdirmir. Əgər onun tələbləri təmin olunarsa, bu iş Britaniya məhkəmə tarixində ən böyük boşanma proseslərindən birinə çevrilə bilər.
Vladimir Potanin isə ardıcıl şəkildə London prosesini dayandırmağa çalışır və boşanmanın artıq Rusiya məhkəmələri tərəfindən həll olunduğunu bildirir. Onun vəkilləri, həmçinin işin Moskvaya keçirilməsinə nail olmağa cəhd göstəriblər ki, bununla da Rusiyadan kənarda baxılmasının qarşısını alsınlar.
İşi daha da çətinləşdirən məqamlardan biri Rusiyada paralel məhkəmə prosesinin aparılmasıdır. Əgər Moskva məhkəməsi qadağa qərarı çıxarsa, Natalya Potanina Böyük Britaniyada prosesi davam etdirəcəyi halda cərimə riski ilə üzləşə bilər.
Biznesmenin vəkilləri vurğulayırlar ki, Rusiya ilə Böyük Britaniya arasında məhkəmə qərarlarının qarşılıqlı tanınmasına dair beynəlxalq saziş yoxdur. Bu isə Britaniya məhkəməsinin potensial qərarının Rusiyada icrasını xeyli çətinləşdirir.
Müdafiə tərəfinin məlumatına görə, Vladimir Potaninin əsas aktivləri Rusiyada cəmlənib. Bunlara “Interros” strukturu və dünyanın ən iri palladium və saflaşdırılmış nikel istehsalçılarından biri olan “Norilsk Nickel”dəki payı daxildir.
Bu isə o deməkdir ki, hətta Natalya Potanina Britaniya məhkəməsində qalib gəlsə belə, qərarın icrası ciddi praktik maneələrlə üzləşə bilər.
Britaniya məhkəmə təcrübəsində bu qəbildən olan işlər ən iri boşanma prosesləri sırasına daxildir. Daha əvvəl Böyük Britaniyada açıq şəkildə məlum olan ən böyük boşanma ödənişi 554 milyon funt-sterlinq olmuşdu. Bu məbləğin 2021-ci ildə Dubay hökmdarı Şeyx Məhəmməd bin Rəşid Əl Məktum tərəfindən keçmiş həyat yoldaşına ödənilməsi qərara alınmışdı.
Natalya Potaninanın vəkilləri bu prosesi “Davud və Qolyafın hekayəsi” ilə müqayisə edirlər və tərəflərin maliyyə imkanları arasındakı böyük fərqi vurğulayırlar.
Bloomberg Billionaires Index-in qiymətləndirməsinə görə, Vladimir Potaninin sərvəti təxminən 27,2 milyard dollar təşkil edir və bu da onu Rusiyanın ən varlı adamlarından birinə çevirir.
Qeyd edək ki, daha əvvəl Rusiya məhkəməsi 30 illik evlilikdən sonra Natalya Potaninaya təxminən 6,4 milyon dollar təyin etmişdi. Onun nümayəndələri isə bu məbləğin ailənin birgə həyat dövründə topladığı ümumi sərvətin cəmi 1 faizi olduğunu bildirirlər.
Bizim.Media
