Yaponiya Nazirlər Kabineti ölkə vətəndaşlarına istəklərinə uyğun olaraq 70-dən yuxarı yaşda pensiyaya çıxmağa icazə verən proqramı təsdiqləyib.
Sənəddə təklif olunan dəyişikliklərin 2020-ci ildə qanunvericiliklə təsdiqlənməsi nəzərdə tutulur.xa0
Yaponiya baş naziri Sindzo Abe bildirib ki, elə bir cəmiyyət yaradılmalıdır ki, istəyə uyğun və fiziki imkanlar mövcud olduğu halda insanlar işləyə və aktiv həyat tərzi keçirə bilsinlər.xa0 Hökumət hesab edir ki, Yaponiyada yaşlıların sağlamlıqları qibtə ediləcək səviyyədədir.xa0
Səhiyyə orqanlarının rəsmi açıqlamalarına görə, ölkədə kişilər orta hesabla 71 yaşına kimi, qadınlar isə 74 yaşına kimi iş qabiliyyətlərini saxlayırlar. Hökumət yaşlılara əsas əmək rezervləri kimi baxır.xa0
Qocalıq və demoqrafik tənəzzül isə ölkənin ən kəskin sosial problemi olaraq qalır.xa0
Qeyd edək ki, hazırda ölkədə 65 yaşına çatmış şəxslər pensiyaya çıxa bilirlər. Lakin istəyə uyğun olaraq insanlar 60 yaşından başlayaraq da pensiyaya çıxa bilərlər. Bu zaman pensiyanın həcmi azalır, 65 yaşdan sonra isə əksinə, pensiyaya əlavələr edilir.(Qafqazinfo)
