Süni intellektdən istifadə edənlər hər gün 90 dəqiqə daha çox işləyir

Süni intellekt iş prosesini asanlaşdırmalı və insanlara daha çox boş vaxt qazandırmalı idi. Lakin yeni araşdırma gözlənilməz nəticə ortaya qoyub. Neyron şəbəkələrdən fəal istifadə edən əməkdaşlar bu vasitələrdən istifadə etməyənlərlə müqayisədə orta hesabla 90 dəqiqə daha çox işləyirlər.

Bizim.Media xəbər verir ki, bu qənaətə əməkdaşların məhsuldarlığını qiymətləndirmək üçün proqram təminatı hazırlayan ActivTrak şirkətinin analitikləri gəliblər.

Onlar 2026-cı ilin aprel-sentyabr ayları ərzində 467 şirkətdə çalışan 9 mindən çox əməkdaşın rəqəmsal aktivliyini araşdırıblar.

Tədqiqatın nəticələrinə görə, süni intellektdən istifadə edən insanların iş günü orta hesabla 8,4-9,1 saat təşkil edib. Müqayisə üçün qeyd edək ki, süni intellektdən istifadə etməyən əməkdaşlar gündə təxminən 7,6 saat işləyiblər. Beləliklə, iki qrup arasındakı fərq 90 dəqiqəyə çata bilər.

Bu tendensiya xüsusilə süni intellektdən fəal istifadə edənlər arasında nəzərə çarpıb. Tədqiqat müəllifləri bu kateqoriyaya gündə 45 dəqiqədən çox, ən azı beş ayrı seans ərzində neyron şəbəkələrlə işləyən əməkdaşları aid ediblər.

Belə işçilər süni intellektdən istifadə etməyənlərlə müqayisədə iş vaxtından kənar dövrdə də 18 dəqiqə daha çox işləyiblər. Bundan əlavə, tətbiqlər arasında daim keçid etdiklərinə görə onların tapşırıqlara diqqətini cəmləməkdə daha çox çətinlik çəkdikləri müəyyən edilib.

Tədqiqatçıların baş verənlərlə bağlı bir neçə izahı var. Ola bilsin ki, əvvəldən daha çox işləyən insanlar süni intellektdən də daha tez-tez istifadə etməyə başlayıblar. Digər ehtimal isə avtomatlaşdırmanın əməkdaşlara əlavə vəzifələr götürməyə imkan verməsidir. Həmçinin süni intellektin keyfiyyətsiz cavablarını yoxlamaq və düzəltmək gözləniləndən daha çox vaxt apara bilər.

Oxşar nəticələrə əvvəllər Kaliforniya Universitetinin Berkli şəhərciyində yerləşən Haas Biznes Məktəbinin tədqiqatçıları da gəliblər. Onlar səkkiz ay ərzində təxminən 200 nəfərin çalışdığı İT şirkətinin fəaliyyətini müşahidə ediblər.

Məlum olub ki, süni intellektin tətbiqi iş yükünün azalmasına səbəb olmayıb. Əməkdaşlar daha sürətli işləməyə başlayıb, daha çox tapşırıq götürüb və rəhbərlik bunu tələb etməsə belə, işlərini gün ərzində daha uzun müddətə yayıblar.

Tədqiqat müəllifləri xəbərdarlıq edirlər ki, bu tendensiya uzunmüddətli perspektivdə problemə çevrilə bilər. Əməkdaşlar əlavə iş yükünə alışdıqca yüksək iş intensivliyi tədricən yeni normaya çevrilir.

Nəticədə vaxt qazandırmalı olan süni intellekt iş gününü qısaltmaq əvəzinə, insanların yerinə yetirməli olduğu tapşırıqların həcmini artıra bilər.

Bizim.Media