“Kütləvi imtahanlar elektronlaşdırılacaq” – Məleykə Abbaszadə 

"Kütləvi imtahanlar elektron formada keçiriləcək".

Bizim.Media xəbər verir ki, bunu jurnalistlərə açıqlamasında Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.

O, qeyd edib ki, Dövlət qulluğuna və işə qəbul üçün keçirilən imtahanların hamısı bundan sonra elektronlaşdırılacaq:

"Dövlət İmtahan Mərkəzinin yeni açılan imtahan korpusunda hər gün iki növbə olmaqla təqribən 1700 nəfər qiymətləndirmə prosesinə cəlb oluna bilər. İndiyə qədər keçirilən 45 növ imtahandan 21 elektron formada keçirilib".

M.Abbaszadə əlavə edib ki, ötən il 7 min şəxs elektron imtahanlarda iştirak edib:

"Bundan sonra həmin rəqəmlər dəyişəcək. Bu il üçün ilkin mərhələdə kontengenti 2000-dən az olan bütün imtahanlar bu binada keçiriləcək. Gələn ilin imtahan cədvəli barədə düşünülür. Bir il ərzində bütün imtahanlardakı kontengentin sayı 10 mindən az olan onların hamısını elektron şəkildə burada keçirəcəyik".

Məleykə Abbaszadə bildirib ki, təkcə regional bölmələrə yox, tədris mərkəzləri və müxtəlif universitetlərlə əlaqələr yaradacayıq:

"Çalışacağıq ki, daha kütləvi imtahanları elektron formada keçirək. Yüksəliş müsabiqəsinin onlayn sessiyası bu həftə burada keçiriləcək. Mayın 13-də başlayır. 5 gün ərzində davam edəcək".

Məhərrəm Əliyev, Nicat Niftəliyev, Bizim.Media