Erməni general-polkovnik Qarabağdakı məğlubiyyətin ƏSAS SƏBƏBİNİ AÇIQLADI

2-ci Qarabağ müharibəsində məğlubiyyətə səbəb olan əsas səhv ordunun heç vaxt tam döyüş hazırlığına gətirilməməsidir. 

Bizim.Media xəbər verir ki, bunu KTMT-nin keçmiş baş katibi, Ermənistan Silahlı Qüvvələri Baş Qərargahının sabiq rəisi Yuri Xaçaturov Gorusda vətəndaşlarla görüşündə deyib.

"Dağlıq Qarabağın “Müdafiə Ordusu” tam döyüş hazırlığına gətirilsəydi, bütün mövqeləri və xətləri tutsaydı, kazarmada insanlar, parklardan texnikalar çıxarılsaydı, o zaman hər şey fərqli olardı", deyə o, qeyd edib.

Onun sözlərinə görə, Lələ Təpə yüksəkliyi istiqamətində zəif hazırlanmış əks hücum da doğru deyildi.

O, 1-ci ordu korpusunun döyüş əməliyyatlarında müharibə başladığı gündən iştirakını səhv adlandırıb. Ermənistan Silahlı Qüvvələri Baş Qərargahının keçmiş rəisinin fikrincə, bu korpus ehtiyatda qalmalı idi.

Xaçaturov Ermənistanın hazırkı rəhbərliyinin müharibənin nəticələrinin əvvəlcədən müəyyənləşdirildiyi barədə fikirləri ilə razılaşmır. 

General-polkovnik hesab edir ki, son üç ildə zəifləmiş Ermənistan ordusu belə halda da qalib gələ bilərdi, ya da heç olmasa düşmənin irəliləməsini dayandırardı.

Bizim.Media