
- A-
- A
- A+
Naxçıvanda Süni Mayalanma Mərkəzinin əməkdaşları 11 aya yaxındır maaş ala bilmirlər – Video
Naxçıvan Muxtar Respublikası Kənd Təsərrüfatı Nazirliyinin tabeliyində fəaliyyət göstərən Süni Mayalanma Mərkəzinin əməkdaşları əməkhaqlarının gecikdirilməsi ilə bağlı şikayət ediblər.
Bizim.Media xəbər verir ki, işçilərin sözlərinə görə, mərkəzdə çalışan 9 nəfərin əməkhaqqı 11 aya yaxındır tam ödənilmir.
Onlar yaranmış problemin aidiyyəti qurumlar tərəfindən araşdırılmasını və yığılıb qalmış maaşlarının ödənilməsini istəyirlər.
Əməkdaşlar iş yerlərini itirməkdən ehtiyat etdikləri üçün məsələ ilə bağlı kamera qarşısında danışmaqdan çəkinirlər. Bildirirlər ki, uzun müddətdir davam edən gecikmələr ailə büdcələrinə ciddi təsir göstərir, gündəlik ehtiyacların qarşılanmasını çətinləşdirir.
Məsələ ilə bağlı Naxçıvan Muxtar Respublikası Kənd Təsərrüfatı Nazirliyindən bildirilib ki, Süni Mayalanma Mərkəzinin fəaliyyəti və saxlanma xərcləri əsasən törədici buğalardan alınan toxumların satışından əldə olunan vəsait hesabına qarşılanır. Həmin gəlirlər hesabına əməkdaşların maaşları sentyabr ayınadək ödənilib. Hazırda qalan məbləğin, eləcə də digər aylar üzrə əməkhaqlarının qısa müddətdə ödənilməsi istiqamətində işlər aparılır.
Nazirliyin açıqlamasında gecikmələrin əsas səbəbi kimi mərkəzin təsərrüfat hesablı fəaliyyət göstərməsi qeyd olunub. Yəni əməkhaqları və digər xərclər əsasən satışdan əldə edilən gəlirlərdən asılıdır.
Qeyd edək ki, Süni Mayalanma Mərkəzinin yaradılması və tikintisi məqsədilə 2019-cu ildə dövlət büdcəsindən 4,8 milyon manat vəsait ayrılıb.
Space TV-nin bununla bağlı videosüjetini təqdim edirik:
Bizim.Media
Mətndə səhv varsa, onu qeyd edib ctrl + enter düyməsini basaraq bizə göndərin.



























































































