Milyarderlər bu kurorta axışır – Yerli sakinlər etiraza HAZIRLAŞIR

ABŞ-ın Aydaho ştatındakı sakit Sun Valley kurortu iyulun 7-dən etibarən dünyanın ən varlı insanlarının toplaşdığı mərkəzə çevrilib. "Allen & Co." investisiya bankının təşkil etdiyi və "milyarderlərin yay düşərgəsi" adlandırılan bu ənənəvi konfransda qlobal iqtisadiyyatın taleyi qapalı qapılar arxasında müzakirə olunur.

Bizim.Media xəbər verir ki, tədbirin təfərrüatları (və ya onların yoxluğu) bu il də diqqət çəkir:

Tədbir günlərində "Friedman Memorial" aeroportunun yüklənməsi 4 dəfə artır. Gündəlik 300-350 şəxsi təyyarə eniş-uçuş edir. Məxfilik naminə iştirakçıların çoxu "NetJets" və "Vista" kimi korporativ uçuş şirkətlərindən istifadə edir ki, şəxsi təyyarələrinin izlənilməsinin qarşısı alınsın.

Kimlər iştirak edir? Siyahı olduqca nüfuzludur: Tim Kuk (Apple), Mark Zukerberq (Meta), Sem Altman (OpenAI), Ceff Bezos (Amazon), Bill Qeyts, habelə Disney, Netflix və Warner Bros kimi media nəhənglərinin rəhbərləri.

Davosdan fərqi: Burada rəsmi tribuna və bəyanatlar yoxdur. Sövdələşmələr səhər qaçışları, qolf oyunları və ya qeyri-formal şam yeməkləri zamanı "təkbətək" formatda bağlanır. Tarixən Disney-in ABC-ni, Ceff Bezosun isə "The Washington Post"-u alması məhz bu görüşlərin nəticəsidir.

Yerli narazılıq: Milyarderlərin on milyonlarla dollarlıq malikanələr aldığı və bölgədə infrastrukturu dəyişdiyi bir vaxtda, yerli sakinlər yüzlərlə reysin yaratdığı səs-küyə qarşı etirazlara hazırlaşırlar.

Konfransın gündəliyi və iştirakçı siyahısı ənənəvi olaraq rəsmi şəkildə açıqlanmır.

Bizim.Media