Rusiyanın elan etdiyi atəşkəsi qəbul etməyən Ukrayna hücumlarına davam edir. Belə ki, son bir neçə saat ərzində Ukrayna Rusiyanın bir neçə bölgəsinə PUA zərbələri endirib. Xüsusən Yaroslavl vilayətində və Rostovda neft emalı zavoduna hücumlar olub.
İlkin məlumata görə, zərbələrdən sonra “Slavneft-YANOS” neft emalı zavodunda güclü yanğınlar baş verib.
MÖVZU İLƏ BAĞLI:
Ukraynadan Rostova PUA HÜCUMU – Zavodlar alovlara qərq oldu – VİDEO
Həmçinin Rusiya sabah, 9 May Qələbə bayramına hazırlaşır və bir neçə ölkənin dövlət və hökumət başçısı da tədbirdə iştirak edəcək.
Bəs Ukraynanın sabah Moskvaya hücumu gözlənilirmi?
Mövzu ilə bağlı Bizim.Media-ya danışan ukraynalı hərbi ekspert Aleksandr Kovalenko bildirib ki, Ukraynanın həftənin, ayın və ilin istənilən günündə, hər hansı bayram olub-olmamasından asılı olmayaraq, Rusiya Federasiyasının ərazisinə zərbələr endirmək üçün tam hüquqi, qanuni və mənəvi haqqı var:
“Bizi Rusiyada 9 Mayın qeyd olunması və bu bayrama verilən önəm qətiyyən dayandırmır. Rusiya işğalçı dövlətdir. Buna görə də biz Pasxa, 9 May, Putinin ad günü, Yeni il və ya Milad bayramı olmasından asılı olmayaraq, onun ərazisinə sistemli zərbələr endiririk. Onsuz da hər gün hansısa bayram var. Buna görə də düşünrəm ki, Rusiyanın bu cür bəyanatları bizi dayandırmamalıdır”.
Kovolenko əlavə edib ki, Ukraynanın həyata keçirdiyi bu sistemli zərbələr əsasən hərbi obyektlərə yönəlir.
Bu zərbələr neft emalı zavodlarına, anbarlara, aerodromlara, Rusiya ordusunun yerləşdiyi və bazalaşdığı digər məntəqələrə edilir:
“Bu səbəbdən düşünmürəm ki, bizim üçün Qırmızı Meydana zərbə endirmək maraqlı hədəf olsun. Çünki orada çoxlu sayda mülki əhali olur. Biz Rusiya ərazisinə, xüsusilə də işğal olunmuş ərazilərə zərbələr endirərkən, mülki əhali arasında mümkün itkiləri minimuma endirməyə çalışırıq. Daha dəqiq və yüksək dəqiqlikli zərbələr həyata keçirməyə üstünlük veririk.
Bu səbəbdən, əgər Qələbə Günü Rusiya ərazisinə zərbə endirilərsə, bu zərbənin Qırmızı Meydana yönəlməyəcəyi dəqiqdir. Onun tamamilə başqa hədəflərə yönələcəyi ehtimal olunur. Ola bilsin ki, zərbələr Moskva vilayəti və ya Moskvanın özündə həyata keçirilsin, amma dəqiq olan budur ki, Qırmızı Meydan hədəf olmayacaq”.
Lakin ekspert Qırmızı Meydana mümkün hücumu da istisna etməyib:
“Bu qərar, əlbəttə ki, yalnız Ukraynanın Ali Baş Komandanı, Prezident Volodimir Zelenski tərəfindən verilə bilər. Lakin yenə də mənim fikrimcə, bizim 9 Mayda belə sistemli əməliyyatlar həyata keçirmək üçün həm mənəvi, həm də hüquqi baxımdan tam haqqımız var. Xüsusilə də ona görə ki, Rusiya Federasiyası Volodimir Zelenskinin mayın 5-dən 6-a keçən gecədən etibarən daha uzunmüddətli atəşkəs və ya sülh təklifini tamamilə rədd etdi. Əksinə, Rusiya Ukrayna ərazisinə zərbələr endirdi və əsasən mülki obyektləri hədəfə aldı. Nəticədə onlarla dinc sakin həlak oldu”.
Ekspert əlavə edib ki, Rusiya bu şəkildə Ukraynaya qanlı çağırış etdi və özü üçün nisbətən sakit keçə biləcək 24 və ya 48 saatlıq müddət öncəsində belə faciəni davam etdirdi:
“Biz yalnız rusların bundan sonra da ukraynalıları öldürmək istədiyini görürük. Eyni zamanda onlar istəyirlər ki, ukraynalılar onların ultimatumlarına uyğun davransın və həmin tələblərə əməl etsinlər. Düşünürəm ki, Rusiya tərəfindən verilən bu təklifin cavabsız qalması yanlış addım olardı. “Sükut rejimi”nin qorunması barədə çağırışlara gəlincə isə, məncə, hazırkı vəziyyətdə əksinə proses müşahidə olunur”, - deyə A.Kovolenko əlavə edib.
Tehran Orucoğlu, Bizim.Media
