Ermənistan Türkiyəyə “yol xəritəsi” təqdim edib?

Ermənistan iki ölkə arasında münasibətlərin tənzimlənməsini nəzərdə tutan “yol xəritəsi” hazırlayıb və onu 10 gün öncə qapalı kanalla şəxsən Türkiyənin xarici işlər naziri Əhməd Davudoğluna göndərib. Musavat.com-un məlumatına görə, bu barədə erməni qəzeti “Aravot” Türkiyə XİN-dəki mənbəyə istinadən xəbər yaydığını iddia edib.        

Mənbənin bildirdiyinə görə, sənəd üç konkret təklifdən ibarətdir: 1. Türkiyə rəsmən “soyqırım” faktını və məsuliyyətini etiraf edir və dünya erməniliyindən üzr istəyir. 2. Dərhal Ermənistanla sərhədləri açır və İrəvanla diplomatik münasibətləri bərpa edir. 3. Yalnız bundan sonra Qarabağ məsələsinin dinc yolla həllində Türkiyə vasitəçi qismində çıxış eləmək imkanı qazanır.

Qəzetin iddiasına görə, dekabrın 12-də İrəvana səfər edəcək Davudoğlu təqdim edilən “yol xəritəsi” ilə bağlı rəsmi Ankaranın mövqeyini erməni həmkarı Edvard Nalbəndyanın diqqətinə çatdırmalıdır. 

Əlavə edək ki, dünən Ermənistan xarici işlər nazirinin müavini Şavarş Köçəryan Türkiyə XİN rəhbərinin Ermənistana gözlənilən səfərlə bağlı belə bir ifadə işlədib: “Əgər Türkiyə səmimidirsə, o zaman Əhməd Davudoğlu İrəvanda öncə “genosid” abidəsini ziyarət eləsin”.