Ukrayna Prezidenti Volodimir Zelenski Rusiya rəhbərliyinə meydan oxuyaraq, onları Konstantinovskanı "ələ keçirmələri" ilə bağlı iddialarını sübut etməyə çağırıb.
Bizim.Media xəbər verir ki, iyulun 3-də Rusiya Prezidenti Vladimir Putin hərbi komandanlıqla görüşündə rus qoşunlarının Donetsk vilayətindəki Konstantinovka şəhərini tam nəzarətə aldığını elan edib.
Ukrayna Prezidenti bu bəyanatı "növbəti Rusiya yalanı" adlandırıb. O, satirik bir tərzdə Putinə müraciət edərək bildirib:
"Əgər Konstantinovka hazırda Rusiya nəzarətindədirsə, o zaman Putinin orada mənimlə görüşməsi və müharibəyə son qoymaq üçün diplomatik həll yolları tapması yəqin ki, problem yaratmayacaq".
Ukrayna Baş Qərargahı və cəbhədəki hərbi qruplaşmalar şəhərin Ukrayna Silahlı Qüvvələrinin nəzarətində olduğunu təsdiqləyib. Hərbi analitiklər və "İnstitut for the Study of War" (ISW) ekspertləri də Putinin bəyanatlarının döyüş meydanındakı reallıqları əks etdirmədiyini, bunun sadəcə süni uğur görüntüsü yaratmaq məqsədi daşıdığını vurğulayırlar.
Rusiya Prezidentinin mətbuat katibi Dmitri Peskov Zelenskinin bu təklifinə birbaşa cavab verməyib, əvəzində isə Ukrayna Prezidentini "mühüm və məsuliyyətli qərarlar qəbul etməyə hazır olanda" Moskvaya dəvət etdiklərini bildirib.
Bu hadisə cəbhədəki vəziyyətlə bağlı tərəflərin informasiya müharibəsindəki növbəti kəskin qarşıdurma kimi qiymətləndirilir.

Bizim.Media


































































































