2025-ci il avqustun 8-də Vaşinqtonda keçirilən sammitdən bir il sonra Azərbaycan və Ermənistan arasında sülh prosesinin iqtisadi istiqamətdə də praktiki nəticələri özünü göstərir.
Bizim.Media xəbər verir ki, bu barədə caliber.az-da dərc olunan məqalədə qeyd olunub.
Bildirilir ki, Vaşinqton sammitinin birinci ildönümündə Ermənistanın baş naziri Nikol Paşinyan Azərbaycan Prezidenti İlham Əliyevə zəng edib. Telefon danışığı zamanı liderlər ötən bir il ərzində görülən işləri, ABŞ Prezidenti Donald Tramp və ABŞ hökumətinin sülh prosesində rolunu, həmçinin Azərbaycan-Ermənistan münasibətlərinin normallaşmasında əldə olunan irəliləyişi müzakirə ediblər.
Danışıqlar zamanı konkret iqtisadi məsələlərə də toxunulub. Xüsusilə Azərbaycanın Ermənistana neft məhsulları ixrac etməsi və üçüncü ölkələrdən Ermənistana gedən yüklərin Azərbaycan ərazisindən tranzit keçməsi qeyd olunub.
Məqaləyə əsasən, 2026-cı ilin ilk dörd ayında Azərbaycanın Ermənistana ixracının həcmi 9,5 milyon dolları ötüb.
Bu dövrdə Ermənistana dizel yanacağı, həmçinin Aİ-92 və Aİ-95 markalı benzin göndərilib. Yay aylarına doğru Balacarı dəmir yolu stansiyasından Ermənistana göndərilən yanacağın həcmi on minlərlə tona çatıb.
Məqalədə qeyd olunur ki, bir neçə il əvvəl Azərbaycanın Ermənistana yanacaq ixrac etməsi real görünməsə də, hazırda bu proses adi iqtisadi münasibətlər çərçivəsində həyata keçirilir.
Azərbaycan ərazisindən Ermənistana tranzit yüklərin daşınması da iki ölkə arasında yaranan yeni iqtisadi əlaqələrin əsas istiqamətlərindən biri kimi göstərilir.
Belə ki, üçüncü ölkələrdən Ermənistana gedən yüklərin bir hissəsi Azərbaycan ərazisindən keçməyə başlayıb. Azərbaycan dəmir yolları ilə Ermənistan istiqamətində 32 min tondan çox taxıl, 7 min tondan artıq gübrə və digər məhsullar daşınıb.
Məqalədə vurğulanır ki, bu, 1990-cı illərin əvvəllərindən etibarən ilk dəfə Azərbaycan dəmir yolu vasitəsilə Ermənistana birbaşa yük daşımalarının həyata keçirilməsi baxımından əhəmiyyətlidir.
Yazıda həmçinin qeyd olunur ki, neft məhsullarının tədarükü ilə bağlı razılaşma Bakı və İrəvan arasında birbaşa dialoq nəticəsində əldə olunub və prosesdə xarici vasitəçilər iştirak etməyib.
Müəllifin fikrincə, iki ölkə arasında iqtisadi əlaqələrin genişlənməsi qarşılıqlı asılılığı artırır və bu da sülh prosesinin möhkəmlənməsinə təsir edən amillərdən biri ola bilər.
Məqalədə Azərbaycan Prezidenti İlham Əliyevin 2020-ci il Vətən müharibəsindən sonra Azərbaycan-Ermənistan münasibətlərinin normallaşdırılması və sülh prosesinin təşviqində təşəbbüskar mövqe tutduğu da qeyd edilir.
Yazıda bildirilir ki, Azərbaycan tərəfindən irəli sürülən beş əsas prinsip sülh prosesinin əsasını təşkil edib. Eyni zamanda regionda nəqliyyat əlaqələrinin bərpası və iqtisadi münasibətlərin inkişaf etdirilməsi də Azərbaycanın irəli sürdüyü əsas istiqamətlərdən biri olub.
Məqalənin müəllifi hesab edir ki, Azərbaycanın ərazi bütövlüyünün bərpasından sonra əsas məqsədlərdən biri regionda dayanıqlı sülh və iqtisadi qarşılıqlı əlaqələrin formalaşdırılmasıdır.
Bizim.Media
