Çinin İlon Maska qarşı YENİ SİLAHI – “Starlink”lər sıradan çıxarılacaq

Çinin Milli Müdafiə Texnologiyaları Universitetinin tədqiqatçıları orbitdəki peykləri, xüsusilə də İlon Maskın “Starlink” şəbəkəsini sıradan çıxarmağa qadir olan yeni nəsil yüksək güclü mikrodalğalı silah sistemini təqdim ediblər. 

Bizim.Media xəbər verir ki, bu barədə “South China Morning Post” (SCMP) qəzeti məlumat yayıb.

Məlumata görə, bir neçə impulslu mikrodalğalı şüalandırıcıdan ibarət olan bu unikal sistem kosmosa yönəldilmiş 100 giqavata qədər gücə malik istiqamətləndirilmiş impulslar yaratmaq qabiliyyətinə malikdir. 

Mütəxəssislər qeyd edirlər ki, hətta 1 giqavat gücündə olan impuls belə Yerin aşağı orbitində (LEO) yerləşən kosmik aparatların daxili elektron avadanlıqlarını tamamilə sıradan çıxarmaq üçün kifayətdir.

İlk prototiplər artıq ordunun istifadəsindədir

Çinli alimlər bildiriblər ki, yeni kosmik müdafiə silahının ilk işlək prototipləri artıq uğurla hazırlanıb. Hətta sistemin səmərəliliyini və real döyüş imkanlarını yoxlamaq məqsədilə silahlar poliqon sınaqlarının keçirilməsi üçün Çin Xalq Azadlıq Ordusunun (XAO) xüsusi bölmələrinə təhvil verilib.

Pekin "Starlink" qruplaşmasını öz milli təhlükəsizliyinə potensial təhdid kimi görür, çünki bu peyklər hərbi münaqişələr zamanı ABŞ və müttəfiqlərinə yüksəksürətli və kəsilməz rabitə, həmçinin kəşfiyyat məlumatları təmin etmək gücündədir. Çinin bu addımı kosmosun hərbiləşdirilməsi mərhələsində yeni bir dövrün başlanğıcı kimi qiymətləndirilir.

Bizim.Media