Şirvanda ictimai qaydanı pozan gənc sürücü saxlanılıb.
Bizim.Media “lent.az”a istinadla xəbər verir ki, 21 yaşlı Şükran Mirzəyev (şərti adla) şəhərin Məmməd Əmin Rəsulzadə küçəsində idarə etdiyi “Mercedes-Benz C200” markalı avtomobillə hərəkətdə olarkən yüksək səslə musiqiyə qulaq asıb.
Buna görə o, yol polisi əməkdaşları tərəfindən saxlanılıb və avtomobildə səsgücləndirici qoşulduğu müəyyən olunub.
Məlumata görə, Şükrana səsgücləndirici qoşduğu və avtomobildə konstruksiya dəyişikliyi etdiyi üçün dəfələrlə xəbərdarlıq edilib. Lakin o, bu xəbərdarlıqlara məhəl qoymayıb.
Nəticədə Şükran Mirzəyev barəsində inzibati protokol tərtib olunub. Ş.Mirzəyev özünü təqsirli bildiyini və əməlindən peşman olduğunu deyib.
Məhkəmənin qərarı ilə onun barəsində 10 gün müddətinə inzibati həbs qərarı seçilib.
Bizim.Media
